Shillong, Iaiong 11: Ka Khasi Students Union NEHU Unit (KSU NEHU) hynne ka sngi ki la dawa na u Vice Chancellor (VC) ka skulbah North Eastern Hills University (NEHU) ba dei ban pyndap noh ia ki 198 tylli ki kam ba sah thylli ha kane ka skulbah.
Haba kren sha ki lad pathai khubor u President ka KSU NEHU Unit u samla Richest Malniang ula ong ba ka seng ka la leit ban pan jingpynshai na u VC u P. Shukla halor ka jingslem ban pyndap ia ki kam ba sah thylli la kumba shiphew snem eiei.
U samla Richest ula ong ba kine ki 198 ki kam kiba sah tylli kidei ki kam Professor, Assistant Professor bad Associate Professor bad kane ka jingbym lah ban pyndap ia kine ki kam ka la wanrah ka jingduhnong ia kane ka skulbah.
“Ngi la dawa ba kane ka skulbah NEHU kadei ban pynkloi ban pyndap ia kine ki ka ba sah thylli lym kumta ka seng ka shim da kiwei ki sienjam ban pynbor ia kane,” la ong u samla Richest.
U samla Richest ula ong ba lada ym lah ban pyndap ia kine ki kam basah thylli, kan long ka jingduhnong bakhraw ia ki 1200 ngut ki khynnah kiba dei ki Research Scholar ha kane ka skulbah bad kan wanrah ka jingdkoh ha ka rukom ai jinghikai ruh ia ki samla pule.
Ula ong ba na ka liang jong u VC u la kular ba ha u bnai Jymmang un sa ialeh ban pyndap noh ia kine ki kam ba dang sahteng bad ka seng ka khmih lynti ba ka jingkren kam dei ban long tang da kane ka ktien hynrei kadei ban long da ka kam.
Nalor kane une u President ka KSU NEHU Unit ula ong ba ka daw ba pynlong ban slem ban pyndap ia kine ki kam ba sah thylli, ka long ba ki VC barim mynshwa kim pyndep ia kamram jong ki ban khot Advertisement.
