Shillong, Jymmang 18 : Ka Khasi Students Union (KSU) kala dawa ia ki riewsain pyrthei (Politician) ka Ri-lum Khasi Jaintia ba kin pyrshah jur ia ka jingthmu jong ka Sorkar MDA ban sdang pyntreikam ia ka Roster System jong ka Job Reservation Policy ka Jylla naduh ki snem bala leit noh (1972).
“Ka KSU ka kyntu ia baroh ki Politician Khasi ba ki dei ban pyrshah beit ia ka jingpynphai dien(retrospective) ia ka Roster System bad ban dawa ba dei ban pyntreikam beit shakhmat (prospectively)” ong u General Secretary ka KSU samla Donald Thabah kat kum ka kyrwoh bala phah sha ki lad pathai khubor.
Kane ka jingkyntu ka KSU kala mih shisngi shuwa jong ka jingialang jong baroh ki seng sain pyrthei ka Jylla bala khot da ka Sorkar MDA lashai ka sngi 19 tarik Jymmang, ban iatai halor ka jingpyntreikam ia ka Roster System hapoh ka Jylla.
Une u Nongialam ka KSU ula ong “Ka jingmih jong ka Roster System kumba paw hi ka dei namar ka jingbthah ka High Court of Meghalaya ia ka sorkar jylla. Hynrei kaba sngewsih pat ka long ba ka sorkar jylla haba pyntreikam ia kane ka Roster System ka la kyrtiang biang shadien da kaba wanrah ia ka jingbym biang ka ioh kam ki Garo katkum ka bhah 40:40 katkum ka jingujor katto katne tylli ki kynhun sengbhalang na Garo Hills, bad bsut ia kane ha ki jingthung kam kiba mynta kiba la ktah shibun eh ia ki samla wad kam Khasi namar ka jingioh bhah ki Khasi mynta kam dei shuh 40% hynrei ka la hiar shuh shuh”.
“Hooid lada kheiñ wat na ka ‘population ratio’ ruh ka bhah 40:40 ka la pynduh nong bha ia u Khasi namar ka Jaidbynriew Khasi ka kham heh paid ban ia ka Jaidbynriew Garo hynrei ka jingkyrtiang dien (retrospective) ia ka roster system ka la buh jingeh arshah ia ki samla Khasi ba mynta namar kim ioh pura shuh wat tang ia ka bhah 40%” ula bynrap.
U samla Donald ula ong “ Lad aka Sorkar ka sngew ba ka jingphaidien ia ka Roster System ka dei na ka bynta ban pyndap ia ka jingduhnong ki Garo naduh u snem 1972, kane ka long pat kum ka jingpynshitom, jingpynsaja bad jingtei pop ia ki samla Khasi kiba wad kam mynta”.
“ Tang namar ba phi sngew ba kiba mynshwa ki la bakla ym dei pat ban pynshitom (punish) ia ki samla Khasi mynta kiba luilui, ki bym don bynta eiei ha ki jingjia ba mynshwa hynrei kiba kwah tang ban ioh ia la ka hok ka bhah ha ki kam Sorkar” ula ong.
Halor kine kiei kiei baroh, ka KSU kala dawa jur ia ka Sorkar Jylla ba ia Roster System dei ban pyntreikam shakhmat naduh ba la pynmih ia ka bad ym ban phai shadien kaba long kum ka jingiohnong ia kawei ka Jaidbynriew bad ka jingduhnong kaba khraw ia kawei pat ka Jaidbynriew.
