Dawa ka KSU ia ka Sorkar ban khang ia ka jingdie bad pynbthei bomb pataka ha ka Diwali

Shillong, Risaw 30 : Ka Khasi Students’ Union (KSU) ha ka sngi Balang kala dawa ia ki bor District ka East Khasi Hills ba khang pyrshah ia ka jingdie bad jingpynbthei ia ki bomb pataka ha kane ka jinglehkmen Diwali ban wan.

Ha ka shithi sha ka DC Kong RM Kurbah, u Environment Secretary ka KSU Shiningstar Kharbihkhiew ula ong “…Nga don ka jingkyrmen ba phin shim ia ka sienjam ba donkam ha kaban iada ia ka bha ka miat jong ka District jong ngi bad ban pynshlur ia ka jinglehkmen Diwali ka bym ktah ia ka koit ka khiah ia baroh”.

“Katba ka tamasa ka dei kaba kyrpang ia kiba bun ki nongshong shnong jong ka ri India jong ngi bad kumjuh ruh jong ki nongshong shnong bym dei ki trai ri trai muluk jong ka jylla Meghalaya jong ngi, hynrei ka jingktah jong ki bomb pataka ïa ka mariang, ka koit ka khiah jong ki paidbah bad ka jingshngaiñ jong baroh ka dei kaba pynsngewkhia bha. Man la u snem, ka jingpyndonkam palat ïa ki bomb pataka ha ka por Diwali ka wanrah ïa ka jingkiew kaba jur bha ha ka jingjaboh ka lyer, kaba pynlong ïa ki nongshong shnong khamtam ïa kito kiba don jingeh ha ka jingring mynsiem ban shem jingeh ban ring mynsiem bha. Ki kynja dawai iba pynmynsaw, kiba mih na ki bomb pataka ki nang pynsniew ruh ia ki jinglong jingman jong ki tymmen, ki khynnah rit, bad ki mrad ba ri ha iing. Nalor kata, ka jingsawa kaba mih na ki bomb ka ktah ia kito ki bym lah shah ia ki jingsawa kiba jam bad ktah ruh ki mrad bad ki sim kynthup ia ki mrad ba ri ha iing. Shuh shuh, ka jingpyndonkam ïa ki bomb pataka ka wanrah ïa ki jingjia kiba bun kiba ïadei bad ka jingshngaiñ, kynthup ïa ki jingmynsaw na ka jingpyndonkam bakla bad ki jingpluh ba shu jia ryngkhat, kaba buh jingeh ïa ki Emergency services” ula ong.

“Haba pyrkhat ïa kine ki jingktah kiba kongsan, ka jingkhang shipor ïa ki bomb pataka ha kane ka por kan long ka sienjam kaba kongsan bha sha ka jingrakhe Diwali kabym ktah ia ka koit ba khiah bad kaba shngaiñ. Bun ki nongshong shnong bad ki kynhun ha ki shnong ki thaw ki kyrshan ia ka jinglehkmen da kiwei pat ki lad ki lynti kum ki diyas, ki sharak, bad ki jingleh tynrai kiba pynneh ïa ka mynsiem jong ka tamasa khlem da pynsniew ne pynjulor ïa ka mariang,” u la bynrap.