Shillong, Risaw 10 : Ka Khasi Students’ Union (KSU) ha ka sngi Ba-ar, kala dawa ia ka tnad PWD (Roads) ba kam dei ban shah pynieng ia ki puja pandal ha ki surok PWD.
Ha ka dorkhas bala ai sha u Chief Engineer ka PWD (Roads), u President ka KSU Laban Circle samla Reuben Najiaw ula ong “Ka seng ka kyrpad rit ia ka bor ba dei khmih ban nym shah lane sangeh ban mynjur bad ai jingbit ha kaban pynieng ia ki pandal bad kiwei ki jingpynitynnad halor ka surok PWD na ka bynta ka jingleh niam puja namar ka pynduk ia ki nongleit nongwan bad ka jingiaid ki kali”.
Ula ong, ba kala don ka jingpynieng pandal halor ka surok PWD ha ki aiom lehniam puja ha kylleng ka thain Laban bad khamtam eh ha Shiv Mandir, Laban bad ki jaka ba marjan ka Laban Police Station.
Haba pynpaw ba ka seng ka burom ia baroh ki jingleh niam bad ki niam bad kam don satia ia kano kano ka jingmut sniew pyrshah ia ka jinglehniam jong ki, u samla Najiar ula ong “Hynrei ka kwah ban kdew ba halor ka jingpynieng ia ki pandal ha surok PWD kala pynduk bha ia ka jingiaid ki kali ha kine ki jaka”.
Ula ong ba ki surok ha Laban ki dei lypa kiba rit bad khapngiah bad ka jingpynieng ia ki pandal bad kiwei ki jingpynitynnad ha surok kan lam sah ka jingkhapngiah ban iaid ki kali bad pynthut ia ki paidbah kiba pyndep iala ki kam ki jam ba manla ka sngi.
