Shillong, Nailur 18 : Ka Khasi Students’ Union (KSU) kala dawa ia ka Sorkar Jylla ban weng noh mardor ia ki ktem beain jong ki shipai Border Security Force (BSF) kiba don ha Sonapyrdi, Ratacherra bad Hingaria bad ban buh shuh huh ia ki khyrdop talasi mynder ha ka National Highway-6 ha East Jaintia Hills District.
Ha ka dorkhas bala phah sha u Symbud Myntri Rangbah ba khmih ia ka kam Pohiing Bah Prestone Tynsong hynne ka sngi Nyngkong, u President ka KSU-EJH Streamly N Suchen ula ong “Ngi kyrpad ban leh eiei noh mardor ha kaban weng ia kine ki ktem beain jong ki BSF bad ban leit buh noh sha ki jaka khappud ba kyndong eh ka Ri bad ruh ban shimkhia ia ki kam thombor bad ban tyngrong ia ka jingkitkhlieh ia ki kam ba kila leh”.
“Ngi kyrmen ba phin shim ia ki sienjam ha kaban weng noh ia ki jingeh bala mad da ki paidbah kiba shong basah marjan kine ki ktem BSF ha Sonapyrdi, Ratacherra bad Hingaria” ula ong.
Ula ong ba ki don shibun ki jingujor ba ka seng kala iohpdiang halor ka jingle donbor bad jrong kti jong ki shipai BSF ha ki jaka ba marjan jong ka surok NH-6.
U samla Suchen ula ong ba ha ka 2 tarik Lber, 2023, ka kynhun ki shipai BSF ba phong uniform pura bad ba kiengsuloi, kila thombor ia uwei u samla pule ka shnong Huroi katba u dang iaid lynti sha skul.
“Kane ka jingjia kala pynsngew langknia ia ki Nongshongshnong bad pynim ia ki hapdeng ka jingsyier. Kane ka kam kala pynlong ia ki Nongshongshnong bad ka Seng ban pynrem jur ia kine ki shipai BSF bad la don bun ki khep ruh baki shipai BSF kila pyrshang ban pyntieng pynsmiej bad pyni bor ia ki nongshongshnong” ula bynrap.
U ong ba ki jingthombor jong ki shipai BSF ki kynthup na ka jingtohkit khlem daw, ka jingtalasi ia ki kali ba jia man ka por bad ka jingbym burom satia ia ki traishnong. Kine ki kam kila wanrah ia ka jing sngew tieng bad rit mynsiem hapdeng ki Nongshongshnong, kaba la krah jur ruh ia ka jingim jong ki ba manla ka sngibad ka bha ka miat baroh lang.
Ha kajuh ka por, ka KSU-EJH kala dawa ia ka Sorkar Jylla ban buh shuh shuh ia ka Anti –infiltration check gate ha ka surok NH-6 khamtam ha Tongseng khang ban tehlakam ia ka jingwan rung kyrthep ki mynder kiba dei na Bangladesh.
Une u Nongialam ka KSU u pyntip ba ka KSU Narpuh Circle dang shen kala ioh bat ia ka jingwan rung ki nong Bangladesh na khlaw Kuiang hadien ba ki jam na shiliang u pud u sam ka Ri.
U samla Suchen ula ong ba kila bun ki khep ba ka seng bad ka Dorbar Shnong, kila ioh ban bat ia ki nong Bangladesh ba wan rung tuh bad kine mynta kila shah pynngat ha ki kyndon bapher bapher jong ka Ain.
Halor ka jingshah pyniap kawei ka Longkmie ha ki nong Bangladesh, u samla Suchen ula ong ba lyngba ka jingai sakhi jong ki trai shnong bad kiwei ki sakhi satar ba ka khyrdop ba don mynta ha ka thain ka dei ka bym lah ban tehlakam shuh namar ka jingbun palat ki mynder ri kiba iaid lyngba, kumta ka jingbym buh ia ka khyrdop ha Tongseng kan nang plie lynti ia ka jingwan rung ki mynder ka bym lah ban pyrkhat shuh shapoh ka District.
“Khnang ban iada ia ka bha ka miat jong ki paidbah ka East Jaintia Hills bad ban pynneh skhem iala u pud u sam, ngi kyrpaf ia ka jingtuklar jong phi ban buh sa ka khyrdop talasi mynder ha Tongseng” ula ong.
