Dawa ka KSU ban thungkam shuwa iaki trai Jylla ha ka kam MHO bad doktor Specialist

Shillong, Nailar 23 : Ka Khasi Students Union (KSU) kala dawa ia ka Tnad ka Koit ka Khiah ba kan ailad shuwa ia ki doktor trai jylla ba kin ioh ia ki 170 tylli ki kam contract kiba dei jong ka kam Medical & Health Officer bad ka kam Specialist.

Kane ka jingdawa kala mih halor ka jingkhot ka Tnad ka Koit ka Khiah ia ka Walk-in-Interview ia 170 tylli ki kam contract hapoh ka Tnad ba kynthup ia ka kam Medical & Health Officer ba lait 70 tylli bad ka kam doktor Specialist ba lait 100 tylli.

“Ka Seng ka sngew ba namar ba kine ki kam ki dei kiba hap hapoh ka Sorkar Meghalaya, kumta ka dei ban plie lad shwa ia ki trai shnong ka Jylla ha ka jingthungkam ym ban plie kyllum lang ia baroh ki nong India bad ia kito kiba na ka thain Shatei Lam Mihngi” ong u samla Donald Thabah, General Secretary ka KSU.

Ha kajuh ka por, ka KSU ka buh jingkylli ia ka Tnad ba balei kam ailad ban long da ka eksam ka ban pyniap da ka Meghalaya Medical Recruitment Board ?.

“Ki don bun ngut ki samla na Jylla kila la pyndep iala ki jingpule ha ka lain Medical bad katei ka jingleit haduh 170 tylli ki kam kan ailad ia ki ban thep ia kitei ki kam lada mang beit tang ia ki nong Meghalaya. Hynrei sngew thamula ba ka Sorkar ka plie pynban ia ka lad aikam aijam sha baroh ki nong India” pynpaw ka KSU.

“Hato ka Tnad ka Koit ka Khiah jong ka jylla Meghalaya ka dei jong ka jylla ne ka dei ka tnad sorkar pdeng?” kylli ka KSU haba dawa ia ka Sorkar ba ka dei ban pynbeit mar mar ia kane ka kam bad kyntu ruh ia k aba ka dei ban long ka nongai kam ia ki trai jylla ym ia ki bar jylla.

Pule ruh: Phah tuklar ka VPP ha ka Sorkar ban pynkut ia ka jingpynibor ka MCTA bad ka NEHU

PEIT:

Ka rynsan khubor digital ba pura ka Meghalaya da ka ktien Khasi.

Balei ban ap ia ka lashai, haba ki khubor ki mih mar syn jia!

Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!