Shillong, Risaw 06: Ka Khasi Students Union (KSU)kala dawa naka sorkar jylla ba kadei ban pynshitom ia u Pulit uba la ai ka jingbthah ban kawang da ki bomb pynsat khmat bad ban bom iaki nonghikai skul kiba pynlong iaka jingiakhih kaba jai jai.
“Ka KSU ka pynrem jur ia kane ka jingleh ki Pulit bad ka dawa ban pynshitom ia u Pulit ba ai jingbthah ban kawang bomb pynsatkhmat bad ban bom lathi ia ki Nonghikai kontrak ba iakhih jai jai” ong u Chairman ka Education Cell ka KSU samla Raymond Kharjana.
Une u nongialam ka KSU, u la buh jingkylli balei ym shim la buh ia ki pulit kynthei haka por ba ka don katei ka jingiakhih bad ka jingpyndonkam da ki pulit shynrang ban bom ia ki nonghikai kynthei bad ka aiñ kaba kumno la pyndonkam, kaba shah ia ki pulit shynrang ban bat ia ki riewkynthei ne ia ki kynthei.
“Ka jingdon ki nonghikai ka duna bha bad ka jingiakhih ka long kaba jai jai, hynrei ym lah ban sngewthuh ba ki pulit ki hap ban pyndonkam da ka bor ban pyndonkam da ki bomb pynsat khmat ia ki nonghikai. Nga tharai, nangne shakhmat lada don kano kano ka jingiakhih, ki nongiakhih kila hap ban pynkhreh noh lypa da kawei pat ka rukom khnang ba kin lah ban iakhun ia ki bor pulit” ong u Samla Raymond Kharjana.
“Ngi dap da ka jingsngewsih ban tip na ki nongialam jong ki nonghikai ba kila don 4 ne 5 ngut ki nonghikai kiba la mynsaw bad ka KSU kan don ryngkat bad kan ai ka jingkyrshan kaba pura ia ki nonghikai kontrak bad kan ym ailad ba kan don kano kano ka jingiuhroit iaka hok ka jongki” ula bynrap.
Une u Nongialam ka KSU ula ong ba lada jia ba ki pulit ki pyndonkam biang ka bor, ka seng kan ym sngap jar hynrei kin mih ban shim da kiwei pat ki lad ki lynti ban iakhun pyrshah ia kane ka jingthombor ia ki nonghikai.
Ula ong, ka sorkar kam lah ban shu sngap jar iaka jingdawa ki nonghikai, hynrei kadei ban khot iakren bad ban wad ia ki lad ki lynti hynrei ban shu ieh sah kumne hapoh surok ba kin thiah miet, ka long kaei kaei kaba u paidbah ka jylla yn ym lah ban shu sngap jar.
