Shillong, Jymmang 09 :Ka Khasi Students’ Union (KSU)-Huroi Unit, kala dawa ia ka MLA ka Sutnga-Saipung Kong Santa Mary Shylla, ba kan tynruh sha ka Sorkar Jylla ba kan pynkynriah noh mardor ia ki shipai Border Security Force (BSF) kiba la kynnoh shong be-ain bad pahara ha surok Sonapyrdi.
Ia kane ka jingdawa la buh hakhmat ka MLA kaba mihkhmat ia ka thain, ha ka jingleit jurip jong ka ia ka shnong Huroi hynne ka sngi Ba-ar. Ki Nongialam ka KSU hapoh ka jingialam u President samla Wallam Lamin Gadew kila iakynduh mar khmat ia ka MLA ban iakren halor kane ka kam.
Ka KSU kala pyntip ia shibun ki jingeh ba ki nongshongshnong ki shnong khappud ki iakynduh naka jingbuh ktem beain jong ki shipai BSF ha jingkieng Sonapyrdi haba kynnoh ba kine ki shipai ki ju pyndik man ka por ia ki paidbah ha ka leit ka wan bad ka kit ka bah, kiba dei n aka shnong Lejri, Lahalein bad ka shnong Huroi.
Nalor kane, ka KSU kala pynsngew ruh ia ki jingeh jong ka thain ha ka liang ka surok namar ka jingktieh palat.
Ka KSU ka pyntip ba ka MLA Kong Santa Mary Shylla kala ai ka jingkular ba kan sa shimkhia ia kine ki mat ha kaban pynsngew sha ka Sorkar Jylla bad ruh ban sa pynsngew sha ki bor ba dei peit ia ka Tnad kam pohiing ka Sorkar India halor ka jingbuh ktem ki shipai BSF ha Sonapyrdi.
Kumban shu pynkynmaw ba ka jingdawa pynkynriah jong ka Seng ia ka ktem shipai ha Sonapyrdi kam dei shuh ka ba dang thymmai hynrei ka dei ka mat ka ba la dawa na ka por sha ka por namar ha katei ka jaka kam dei shuh ka ba shngaiñ ia ki paitbah ha ka leit ka wan namar ka jingkynnoh leh donbor bad leh riewkhlaw ki shipai sha ba palat.
