Shillong, Nailur 24 : Ka Khasi Students Union (KSU) hynne ka sngi Baar kala dawa ba dei ban pynduh noh ia ka kyndon ba dei ban don ia ka Master Degree jong ka Forensic Science na ka bynta ban thungkam ha ka Directorate of Forensic Science.
Ha ka shithi kaba la phah sha u Director ka Directorate of Forensic Science, u Chairman ka KSU Employment Monitoring Cell Reuben Najiar ula ong, “Ka Seng ka dawa ba dei ban pynkylla ia ka jingpynbna paidbah bala pynmih da ka MPSC halor ka jingkwah jong ka Directorate of Forensic Science. Dei ban pynduh noh ia ka jingkyrdan pule ba dei ban don ia ka Master Degree ha ka Forensic Science hynrei ban ailad ia kino kino ki sobjek Science katkum ka aiñ bad ym dei ban iaid lait ia ka”
“Ka Seng da ka jingsngewrit ka kyrpad ia phi, ban pyrkhat bad pynbeit noh mardor ia katei ka jingpynbna paidbah, khnang ba kiwei pat ki kyrtong kin lah ban applai na ka bynta ka kam kaba lait” ong u nongialam ka KSU.
Haba pynpaw ïa ka jingsngewkhia halor ka rukom treikam kaba la jied da ka Directorate na ka bynta ban thungkam, u samla Rueben Najiar ula ong, ba ka MPSC ha ka jingpynbna paidbah ha ka 19 tarik u Nailur 2024 kala pynmih ba lait ki kam bapher kynthup ia ka Scientific Officer, Senior Scientific Assistant, Scientific Assistant ha ka Mobile Forensic Crime Scene Unit hapoh jongka Directorate of Forensic Science bad baroh ki long na ka bynta 27 tylli ki Post.
Ka KSU kala shem ba ki kyndon ban ioh iakhun ia kitei ki kam kiba lait, ka long ba dei ban don ia ka Master Degree ha ka Forensic Science, hynrei ki kyrtong kiba la pass ia kiwei pat ki sobjek Science kim shym la ioh ia ka lad ban applai ia kitei ki kam kiba lait.
Ka KSU kala leh ïa ka jingïanujor ha kaba iadei bad katei ka bynta bad kala shem ba ha kiwei pat ki jylla jong ka ri, ki kyrtong kiba don ïa ka master degree ha kano kano ka sobjek Science kum ka Physics, Chemistry, Zoology bad kiwei kiwei, ki lah ban applai na ka bynta kitei ki kam ym tang ia kiba don ia ka kyrdan Master Degree ha ka Forensic Science. Kumta, kane ka kyndon kyrpang kaba la buh da ka Directorate kala pynduh lad ia ki kyrtong kiba don ia ka Master Degree ha kiwei pat ki sobjek Science.
Haba pynpaw ïa ki katto katne ki mat ba pyni ba katei ka kyndon ka don ia ka jingbakla bad ka donkam ban pynbeit, u samla Reuben Najiar ula ong, “Kaba nyngkong, ka Master Degree ha ka Forensic Science kam pat don ha ka jylla haduh mynta bad kino kino kiba kwah ban pule ia kane ka sobjek ki hap ban leit shabar ka Jylla. Kumta, tang u briew uba bit ba biang ha ka liang ka pisa tyngka un lah ban leit pule ia katei ka sobjek, katba u briew uba wan na ka iing kaba duna ha ka ioh ka kot un ym lah ban bteng ia ka jingpule. Nalor kata, ki don tang shikham ki samla pule na Meghalaya kiba leit pule ia katei ka sobjek bad da ka jingbun ki kam ba lait, lehse yn ym lah ruh ban pyndap ia kitei ki kam kiba lait.”
“Ka ba-ar, katkum ka Meghalaya Forensic Science Laboratory Services Rules, 2021, la kdew shai ba na ka bynta kitei ki kam kiba la kdew haneng, ka kyrdan pule ka long ba dei ban don ia ka Degree ha kano kano ka sobjek Science bad kam shym la don ia kano kano ka jingkhang ban don ia kano kano ka Degree ha ka Science.Kumta, ka Directorate kaba buh ïa ki kyndon ban ïoh ïa ka Master Degree ha ka Forensic Science ka long kaba pyrshah ia ki kyndon aiñ kiba la don lypa bad kumta kane ka long kaba be-aiñ bha bad ka jingbym kheiñ snep ïa ka aiñ kaba la don,” ula bynrap.
Nalor kane, u nongïalam ka KSU ula pynpaw ba ka Seng kala shem ruh ia ka jingthung kam da ka kontrak kaba la leh ha u Naiwieng bad Nohprah 2023 na ka bynta ka kyrdan Scientific Officer bad kiwei kiwei, ha kaba ka kyrdan jingpule ka long ba dei ban don ia ka Degree ha ka Forensic Science.
“Ïa katei la leh tang ban khanglad ïa ki samla pule Science kiba wan na kawei pat ka lain Science khnang ban ai jingmyntoi ïa ki katto katne ki kyrtong kiba ioh jingkyrshan na ki politishan bad ki heh ophisar ban rung ha kitei ki kam da kaba pynkylla pat ïa ki kyndon pule ban ia shah ia ki” la pynpaw ha ka shithi.
