Shillong, Nailur 04 : Ka Khasi Students Union (KSU) ha ka sngi Nyngkong, kala dawa ban pynduh noh mardor ia ka bhah pule MBBS jong palat 10 ngut ki samla bala shah jied na ka Open Category ka State Quota (bhah ka Jylla) namar ba kim shym la lah ban aiti ia ka Permanent Residential Certificate (PRC).
Ha ka shithi bala aiti sha u Myntri Rangbah ka Jylla Conrad K Sangma bad Myntri ka Koit ka Khiah Kong Ampareen Lyngdoh, u President ka KSU samla Lambokstar Marngar ula ong ba 10 ngut ki samla pule kim shym la aiti ia ki kot ki sla ba donkam kat kum ka jingbthah jong ka DHS.
Ula ong ba ka jingbym don ia ka PRC kum kawei na ki kot ki sla ba donkam kala khring sha ka jingpynduh noh ia kine ki samla ban ioh ia ka bhah haba bynrap ba ki Birth Certificate bala aiti ruh ki dei ki bym don ia ki Serial Number bad ka hukum ka Iingkashari ka dei ba hap ban tohkit bniah ba kumno la ai ia kine ki kot ki sla da ki bor ba dei khmih.
“Ka KSU ka dawa ban pynduh noh mardor ia palat 10 ngut ki samla ban ioh ia ka bhah pule MBBS naka thup Open Category bad ha ka jaka jong ki, ki samla kiba dei hok, ki dei ban shah kynthup noh. Ka Union ka kyrmen ba ka Sorkar kan shim ia ki sienjam ba donkam ka ban pynthikna ba ki samla pule ba dei hok jong ka Jylla kin ym shah pynduh iala ka hok bad ki samla kibym tip ki dei kiba naei, ki dei ban shah pynsajia kat kum ka ain” thoh u samla Lambok.
Ka shithi ka pynpaw ba u Mehbub Hassan u khlem aiti ia ka PRC hynrei ula aiti pynban da ka Provisional PRC kaba la ai sha u ha ka 7 tarik Jylliew 2023 ha Dadenggre bad kaba treikam tang 12 bnai. Ia une u samla la kha ha u snem 2001 bad ka Birth Certificate ka dei kaba la ai ha u 2019, ka bym don satia ia u serial number bad ka hukum ka Iingkashari ban pynthikna ia ka.
“U Monimul Ekram Mandal : Khlem aiti ia ka Birth Certificate. La aiti da ka PPRC kaba im tang 3 bnai . Ym shym la aiti ia ka PRC” la pynpaw.
Kumjuh ruh u Ayush Kumar ula aiti tang ka Birth Certificate ba na Bihar khlem ka hukum ka Iingkashari, ki kot ki sla ka CBSE na Rajasthan bad ka PRC na East Jaintia Hills.
U Md Mahmadul Islam: La aiti tang ka Birth Certificate bala ai ha u 2022 watla ia une u briew la kha ha u snem ba bud kata ha u 2003. Ym shym la aiti ia ka PRC hynrei da ka PPRC na West Garo Hills kaba treikam tang 12 bnai.
U Atifa Zaman: Ym shym la aiti ia ka Birth Certificate ne PRC hynrei la aiti da ka PPRC na West Garo Hills kaba treikam tang 12 bnai.
U Chiranjit Kumar Paul: La aiti ia ka Birth Certificate bala ai sha u ha u 2008 watla ia une u briew la kha ha u 2005. Hynrei hangne ruh ym shym la don ka hukum ka Iingkashari. Une ruh u khlem aiti ia ka PRC hynrei da ka PPRC kaba treikam 12 bnai.
Ka Deeya Choudhary: La aiti ia ka PRC hynrei khlem ai ia ka Birth Certificate. Donkam ban hap pynthikna ia ka jaka sah bad ka sngi kha jong kane ka samla.
Further verification required regarding her place of birth.
U Angoor Zaman Hoque: La aiti ia ka Birth Certificate bym don ia ka hukum ka Iingkashari bad ka serial number. Ym don PRC hynrei tang ka PPRC na West Garo Hills kaba treikam tang 12 bnai.
U Abdul Kalam Golam Mahdi Alom: Ka Birth Certificate kaba la ai ha u snem 2014 hadien 12 snem ba kha ia u bad ka bym don satia ia ka hukum ka Iingkashari bad ka serial number. Ym don PRC hynrei da ka PPRC bala aiti ha ka 16 tarik Jymmang, 2023 kaba treikam tang 3 bnai.
U Habibur Rehman: U samla uba mih kyrteng ha ka Waiting List jong ka Open Category u khlem aiti ia ka PRC hynrei ula ai da ka PPRC kaba treikam tang 12 bnai. Ym shym la batai ruh ia ka jaka ba kha ia u.
