Shillong, Nailur 23 : Ka Khasi Students’ Union (KSU) kala dawa ia ka Sorkar Jylla ban pynmih jingpynbna ha ki rynsan paidbah ia ka jingthung bad ai kam ia ki nongthaw policy hapoh ka Meghalaya District Research Fellowship (MDRF).
Ha ka shithi sha u Development Commissioner, Planning, Investment, Promotion and Sustainable Development Department (PIPSDD) Sampath Kumar, ka KSU Employment Monitoring Cell kala pynpaw ia ka jingbym hun halor ka jingthung bad aikam ia ki nongthaw policy hapoh ka MDRF namar ka jingbym pyntreikam ia ki lad ki lynti kiba shai bad bym shah liang.
Ka Bharti Institute of Public Policy ha ka jingiatreilang bad ka PIPSDD, ka Sorkar Meghalaya, kala pynmih ha ka LinkedIn ha u bnai Nailur ia ka jingdon ki 28 tylli ki kam ba lait ba kynthup ia 24 tylli ki kam District Research Fellows. 2 tylli ki kam Data Scientists/Senior Researchers bad kawei ka kam Senior District Research Fellow bad Project Coordinator.
“Ka Union ka kyntu ba ia kum ka kam research/projects/data analysis & collections bad kiwei kiwei, dei ban aiti beit sha ka North Eastern Hill University (NEHU) bad kiwei ki University hapoh ka Jylla ba kin wad ia ki briew ka Jylla bad ailad ia ki riewlum trai muluk ka Jylla kiba tip bha ia ki kam jong ka Jylla ha ka jaka jong ki agency nongwei” ong u Chairman ka KSU Employment Monitoring Cell samla Reuben Najiar ha ka shithi.
“Lad aka Sorkar ka sngew ban puniaid shakhmat bad ka ISB ha ryngkat ka jingiatreilang bad ka MDRF, ka KSU ka dawa ba ia kum kine ki kam dei ban pynbna ha ki rynsan paidbah bad ailad ia baroh ki trai Jylla ba kin lah ban aplai, ban don ia ki rukom thungkam kaba leh thikna/ban jied lyngba ka written examination bad ruh ban buh ba ki 28 tylli ki kam ki dei ban long ia ki trai muluk ka Jylla bad ka jingiaid lait na kane ka jingdawa kan mad ia ka jingpyrshah kaba jur na ka seng” ula maham.
U samla Reuben ula ong ba ka LinkedIn kam dei ka official website jong ka Sorkar Meghalaya ban pynbna ia kino kino ki lad iohkam bad bynrap ba kino kino ki lad aikam ki dei ban mih ha ki rynsan paidbah lyngba ka official website bad ki kot khubor ka Jylla.
“Watla, ha kane ka kam, ka dei ka ISB kaba la pynmih ia kane ka jingthungkam ha ka LinkedIn hynrei ka Sorkar kam shym la pynmih ia kino kino ki jingtip ha ka official website kaba pynlong ia kane ka rukom thungkam kaba sopsop bad ba shimet, kaba ktah bad pynkut lad ia ki riewlum trai muluk ka Jylla bad pynmih ruh ia ka jingsngew ba don ka kam thungkam tang iala ki bahaiing hasem ne ki briew ba ithuh ithaw”.
Nalor kane, ula ong ba ka ISB ha ka jingpynmih ba nyngkong ha LinkedIn kala pynpaw ba 50% na ki kam ba lait yn thep ia ki briew ki bym dei kiba sah ha Meghalaya hynrei ia kane la weng noh hadien.
“Ka Seng ka pyrshah jur ia kum kane ka jingleh jong kum kine ki Agency ha kaba kila wanrah ia ki briew ki bym dei ki nongshongshnong ka Meghalaya ba kin trei ha ka Jylla bad knieh ia ki lad iohkam jong ki riewlum trai muluk jong ka Jylla” ula bynrap.
Une u Nongialam ka KSU ula ong ba ka ISB kala pynpaw ha ka LinkedIn ba ki briew kiba la thung ha kine ki kam kin trei bad iarap ia ki District Magistrate bad Collector ba kin pyntreikam ia ki skhim pynroi bapher bapher bad ban leh eiei halor ki jingeh kiba mih ha ki district.
“Ka long kaba thamula ba ka Sorkar Jylla kam don jingshaniah ha ka jinglah treikam jong ki District Magistrate bad ki Collector jong ka Jylla wat hadien ba kila pass ia ki exam lyngba ka MPSC/UPSC bad kiwei kiwei, ba kin lah ban pyntreikam ia ki skhim pynroi bapher bapher bad ban leh eiei ia ki jingeh dalade ha ka jaka ban don kami a ki jingiarap na kum kine ki agency kiban bthah ia ki halor ki kam jong ki bad ki jingleh treikam jong ki” ula ong.
“Ka Seng kala shem ruh ba kum kine ki consultancy agency kila shlei ha Secretariat bad ki Ophis ha kylleng ka Jylla” ula ong.
 kala dawa ia ka Sorkar Jylla ban pynmih jingpynbna ha ki rynsan paidbah ia ka jingthung bad ai kam ia ki nongthaw policy hapoh ka Meghalaya District Research Fellowship (MDRF).){kind=link}