Shillong, Rymphang 08: Ka Khasi Student Union (KSU) jong ka Warmawsaw Unit Western Border area bad ki nong shnongshnong ka Warmawsaw bad Umsohbar hynne ka sngi balang, kila aipor 2 taiew iaka Karuna Trust Shillong bad iaka ophis District Medical Health Officer (DMHO) Ri-bhoi ban weng noh ia u doctor ba khmih iaka Warmawsaw PHC.
Haba kren sha ki lad pathai khubor u President ka KSU Warmawsaw Unit samla Receive Pator, ula iathuh ba ka seng kala ioh jingujor na ki paidbah ka thain Warmawsaw bad Umsohbar ba kynnoh ba u doctor ba dei khmih iaka Warmawsawa PHC u Dr. Angukato Yepthomi, um ju don hapoh ka jaka sumar bad lada u don ruh ula buaid man ka sngi wat haka por sumar iaki nongpang.
U samla Receive ula iathuh ba iaka Warmawsaw PHC la pyniaid daka Karuna Trust hynrei haduh mynta kane ka jaka sumar kam biang wat iaka bording, ka um bad ki dawai dashin naka bynta ki nongpang bad ki paidbah ki donkam ban thied dawai beit na ki dukan dawa riewshimet haka dor ba rem.
Ula ong ba haka jingshisha ka Warmawsaw PHC kadei ka jaka sumar ba khmih naka bynta ki 20 tylli ki shnong hynrei haduh mynta ki paidbah kim ioh ka jingsumar ka ba biang namar kane ka jak sumar ka don ki lad lynti ban sumar iaki ba pang.
“Nalor ba kane ka PHC kam pat biang ki lad jingsumar, u doctor Dr. Angukato Yepthomi badei khmih iaka Warmawsaw PHC um ju wan bad lada u wan, u wan tang haka por u buaid bad kane ka buh jingma iaki paidbah kiba wan phah sumar ha kane ka PHC bala pyniaid daka Karuna Trust” la kynnoh u bah Receive.
Halor kane u bah Receive ula iathuh ba ka seng haka jingsynran lang ki dkhot sengsamla na Warmawsaw bad na Umsohbar kila leit ban kynduh ia u Co-ordinator ka Karuna Trust ha Shillong bad kin sa kynduh ruh iaka ophis DMHO Ri-bhoi ban dawa weng ia u Dr. Angukato Yepthomi.
Ula bynrap ruh ba lada ka Karuna Trust bad ka ophis DMHO kim sngap iaka jingdawa naka liang ka seng kan lum jingialang jong ki paidbah ka thain Warmawsaw bad Umsohbar haka jingdon lang ki rangbah shnong naka bynta ban shim daki sienjam ba tyngeh ban pynthikna ban ioh ki lad jingsumar ba biang hapoh kane ka thain.
