Nongpoh, Naitung 07 : Ka Dorbar Shnong Khyndewso, Ri-Bhoi District, kala dawa ia ki bor Sorkar ba kin buh da ki ‘speed breaker’ ha ka surok ha man ki jaka paidbah hapoh ka thain, khnang ban wanrah ia ka jingshngain ia ki paid nongiaid nongieng bad tehlakam ia ka jingniah kali khlem akor ki nongniah.
Kane ka jingdawa kala mih namar dang shen, uwei u rangbah na Khyndewso, ula duh noh iala ka jingim, na ka dawka jing shah iuh ha kawei ka Bolero pik-up, kaba la phet krad na kane ka jaka ba jia kane ka jingjia bad khlem lapdien shuh.
Dang shen ka Sorkar Jylla kala dep ban siang rong thymmai ia ka surok na ka shnong Liarbang, Ri-Bhoi District ka ban poi shaduh ka Wah Umkhen bad pyniasoh ia ka Ri-lum Jaintia.
U Rangbah Shnong Bah Nicholas Malai ula ong ba ka jingbym don ki ‘Speed Breaker’ ha kane ka surok ba dang shu dep siang rong thymmai, kala pyniohlad ia ki nongniah kali ban pynher sted ia ki kali khlem da pyrwa ia u paidbah ba iaid ba ieng.
U ong ba kane ka buh ha ka jingma ia ka jingim jong ki paidbah ka thain khamtam ki khynnah skul namar kiba bun ki skul ha ka thain ki dei kiba don harud surok.
U la ong ruh hooid, ka tnad PWD ka la buh ia ki kynja dak (sign) ha ka surok bad bun hi na ki nongniah kali kim sngewthuh ia kitei ki dak ba la buh da ka tnad PWD bad kaei kaba donkam ka long ba ha ki jaka paidbah la dei ban buh ki speed breaker bad ruh ki kynja signboard khang ba ki nongniah kali kin sngewthuh ban pynsuki ia ka kali haba ki iaid lyngba kitei ki jaka paidbah.
