Shillong, Iaiong 04 : Ka Khun Hynniewtrep National Awakening Movement (KHNAM) hynne ka sngi ba-ar, kala dawa ia u Lat ka Jylla Phagu Chauhan ban khot da ka Dorbar Kyrpang na ka bynta ban iatai halor ka Roster System hapoh ka Iingdorbar Thaw Ain ka Jylla.
Kane kala mih hadien ba ka Iingkashari Meghalaya High Court kala kyntait ia ka PIL ha ryngkat ka jingong ba ia ka rai halor u snem ot kyrteng (cut-off date) ba naduh u snem aiu ba ka Roster kan sdang treikam, la ieh ha ka jingiatai hapoh ka Iingdorbar Thaw Ain ka Jylla.
“Namar kata, na ka bynta ka jingbit jingbiang jong ki nongshongshnong, ngi dawa jur ba u Lat ka Jylla un khot ia ka Dorbar Kyrpang kat kum ka article 174 jong ka Riti Synshar ka Ri khnang ban ailad ia ka jingiatai bniah ia kane ka kam ha ka Iingdorbar Thaw Ain” ong u Bah Thomas Passah, Vice President ka KHNAM ha ka kyrwoh.
U Bah Passah ula ong ba ka Iingkashari kala pynpaw da kaba shai ba kan shong ha ka IIngdorbar Thaw Ain ba kan iatai bniah bha halor kane ka kam.
Hynrei ula ong ba u Lamphang ka Iingdorbar Thaw Ain u khlem ailad ia ka jingiatai ba kan long ha ka Dorbar Mang Tyngka bala dep, kaba pyni shai ba ka Sorkar MDA-1 bad MDA-2 kila ialeh katba lah ban pynthikna ba ka State Reservation Policy bad kumjuh ruh iaka Roster bala pynkhreh ka long tang ban ai jingmyntoi ia kawei ka Jaidbynriew ha ka Jylla.
“Naduh ba wanrah ia ka State Reservation Policy, ngi la iohi ia ka jingdon ka jingleh bym hok ia ki paid Khasi bad Jaintia” ula kynnoh.
U Bah Passah haba pynpaw ia ki katto katne ki khep, ula ong, ka State Reservation Policy Resolution ba 12 tarik Kyllalyngkot 1972, kala kren shai ba ka jingbhah ka dei ban long kat kum ka jingdon paid jong ki Jaidbynriew.
“Ka jingdon paid jong ki Khasi bad Jaintia ka long 4,88,350 bad ki paid Garo ki long 3,25,872 kat kum ka khana samari u snem 1972. Namar kata, ka jingsam bha ba mar shiteng kata mar 40% ka dei ka bym iahap bad kaba pynkhein ia ki kyndon jong ka Policy hi” ula ong.
Nalor kata, une u Nongialam ka KHNAM ula kynnoh ba ka bhah jong ki paid Garo la shah ban rah sha kiwei pat ki snem (carried forward) ba bud ha kiba bun ki khep.
“Ha ka jingshisha, la shah ban rah tang shisnem kat kum ka jingpynbna O.M PER/222/71/141 ba 20 Iaiong 1972 hynrei ia ka bhah ki paid Garo la shah ban rah pat sha uwei u snem kaba long haduh 3 snem lynter kat kum ka jingpynbna O.M PER(AR)/654/79/15 bala pynmih ha ka 12 Naipur 1979” ong u Bah Passah.
“Ka Sorkar Jylla kat kum ka jingpynbna O.M PER (AR)/654/79/15 bala pynmih ha ka 12 Nailur 1979 kala shah ban thung kam kyrpang ia ki paid Garo. Kane kam kut hangne, nalor kata ka O.M PER 222/72/163 ba 28 Jymmang 1974 kala shah b aka 40% ka bhah bala ai sha ki paid Garo ba kan treikam ruh sha ki kyrtong ki bym dei ki paid Garo bad ki kyrtong kiba dei na shabar ka Jylla” ula bynrap.
Kat kum ka jingong jong u, kane ka kyndon jong ka Reservation Policy ka dei kaba la pyniaid bakla la bunsien ia kaba la iohi ba kam long satia tang ka jingle bym hok ia ki paid Khasi bad Jaintia hynrei ka jingpynkhein ia ka Policy hi”.
Pule lang ia kane: Pyn-eh triang ka ACHIK ban iapein ia u Snem ot Kyrteng ka Roster bad ka Winter Capital ha Tura
