Shillong Lber 24: Ka Khun Hynniewtrep National Awakenong Movement hynne ka sngi nyngkong kala pynpaw iaka jingsngewkhia halor ka jingleit rung ki briew kiba nabar hapoh ka skulbah NEHU ban thwet ia ki samla pule Khasi.
U Working President ka KHNAM u Bah Thomas Passah ula ong ba ka jingjia ha kine khyndiat sngi ha NEHU naduh ka jingleit rung ki briew tap dur ban thwet ia ki samla pule Khasi bad ka jingwan jong ki briew nabar shapoh ban lehkmen puja bet abir, ki dei ki dak ki shin kiba ka sorkar bad ki bor pulit kin hap ban tem ioh ka pur.
“Ka don ka jingpyrshang ban pynshit bad wanrah jingklumar na ka liang ki briew, seng ki bym dei ki na ka jylla. Lada ki pulit kim kem bad kim pynshitom ia kine ki briew kiba leit ban rung jubor shapoh ka jaka pule ban pynshongshit bad pynklumar, kan pynpaw ia ka jingtlot jong ka aiñ” ula ong.
“Ngi la juh iohi ba lada dei ia ki sengbhalang trai ri tang hapoh shi sngi la shah thwet la shah kem bad shah pynngat case. Kumta na ka bynta ka shongsuk shongsaiñ ka sorkar kadei ban leh ia kaba donkam mardor khlem da pynslem shuh” ula bynrap.
