Dawa ka KHNAM ia ka KHADC ban sangeh ka lum khajna beain na ki khyrdop

Shillong, Jymmang 28: Ka Khun Hynniewtrep National Awakening Movement (KHNAM) ha ka sngi Balang, ka la dawa ia ka Autonomous District Council (KHADC) ba kan sangeh noh ia ka jinglum khajna beain da ki khyrdop ka Tnad Forest bad ki kali shimet.

Kane ka jingdawa ka KHNAM kala mih hadien ka jinglap jong ka RTI kaba la pynpaw ba ki don haduh 25 tylli ki khyrdop ba la buh da ka tnad (Forest) khlaw jong ka KHADC hapoh u snem 2025-26.

Na kine, 16 tylli ki don ha Ri Bhoi District, 4 ha East Khasi Hills, 3 ha West Khasi Hills bad mar kawei ha Eastern West Khasi Hills bad South West Khasi Hills bad ka jingthmu jong kine ki khyrdop ka long ban lum khajna na ki mar khlaw.

Ka RTI ka la pynpaw ruh ba 8 tylli ki khyrdop kim pynioh nong eiei ruh em iaka Council kat haduh u bnai Iaiong 2025 naduh ka jingbuh ia ki patrol station

“Ngi sngew lyngngoh ban tip ba ki don palat 25 tylli ki khyrdop jong ka tnat khlaw (Forest), ha kaba 16 tylli ki don tang ha Ri Bhoi District. Watla ka jingthmu jong kine ki khyrdop ki long ban lum khajna na ki mar rep khlaw, hynrei ka long kaba sngewsih ban tip ba ki juh ki khyrdop ki lum khajna na ki marbam mardih ruh kumjuh” ong u Bah Thomas Passah ha ka shithi sha u CEM ka KHADC Bah S Rynjah.

“Lada kine ki 16 tylli ki khyrdop ki lum khajna na ki mar rep khlem artatien kan wanrah ia ka jingkiew dor jong ki marbam ba kongsan kaba ktah ia ki paidbah. Kumta ngi dawa ia ka KHADC ba  kan pynthikna ba kam dei ban don ka jinglum khajna beain na kine ki khyrdop” u la ong.

Haba buh jingkylli ia ka rai jong ka Council ban buh ia ki jaka pahara (Patrolling Station), u Bah Thomas u la ong ba la pyntip sha ka KHNAM ba ki briew kiba wan da ki kali shimet kila bunkam ka lum khajna beain na ki kali khamtam ha ka por miet ha ka kyrteng jong kine ki jaka pahara.

“Kane ka long kaba be-aiñ pura. Lada ka KHADC ka sngew donkam ban buh ïa ki jaka pahara (Patrolling Stations), ka dei ban pynbiang ïa ki kali treikam jong ka council hi,” u la ong.