Dawa ka KHNAM ia ka KHADC ban nym ai Trading Licence ia ka kompani pahara ha ICAR

Kynnoh pynkhein ki Tnad ka Sorkar Pdeng ia ki Ain ka KHADC

Shillong Jylliew 07: Ka Khun Hynniewtrep National Awakening Movement (KHNAM) kala dawa ia ka Khasi Hills Autonomous District Council (KHADC) ba kam dei ban ai Trading License ia ka HRD Commercial & Industrial Security Force Pvt Ltd.

Kat kum ka jingong ka KHNAM, la kynnoh ba kane ka kompani kala shu kam ba ka dei napoh ka jylla Meghalaya tang ban iohkam iohjam ha ka ophis treikam jong ka Indian Council of Agricultural Research (ICAR), Umiam.

U Working President ka KHNAM Bah Thomas Passah ula phah da ka dorkhas sha ka Chief Executive Member (CEM) ka KHADC Bah Pyniaid Syiem ha kaba ula pyntip ba kala don ka jingpynkheiñ ia ka Trading by Non-Tribal Regulation 1954 da ki ophis jong ka Sorkar Pdeng kiba don ha ka jylla bad da ki bar jylla.

“Ka Indian Council of Agricultural Research (ICAR), Umiam kala khot ia ka Tender na ka bynta ban buh ia ki nongpahara bad ka ICAR kala pynkhamti ia katei ka kam sha kawei ka kompani kaba la long trai da u Bar Jylla u bym shim la don satia iaka Trading License na ka KHADC. Katei ka kompani kaba la ioh ia ka kam kadei ka HRD Commercial & Industrial Security Force Pvt Ltd kaba ka ophis treikam ka jongka ka don ha Karimganj, Assam” ong u Bah Passah.

“Ka ICAR kala bthah ia katei ka kompani ban ai iaka Trading License hynrei ha kajuh pat ka por kala bthah ia katei ka kompani ba kan sdang noh ia ka kam kontrak ka jong ka bad kane ka dei ka jingpynkheiñ ia ka Trading by Non-Tribal Regulation 1954” ula kynnoh.

Lah ban kdew ba katkum katei ka aiñ ha ka para 3 (1) la ong, ba ym shah ia uno uno u briew lait noh tang ia u riewlum uba dei u nongshong shnong jong ka District uba lah ban trei ne leh ia ka kam khaii pateng hapoh u pud jongka Khasi Hills Autonomous District lait noh tang lada ai ia ka Lisen na ka bynta ka jongki. Kane ka pyni ba ki bar jylla kim lah ban trei ne khaii hapoh u pud u sam jongka KHADC khlem ka Trading License kaba biang, kumta ka jingai iaka kontrak da ka ICAR bad ka jingailad ia u kontraktor ban ai iaka Trading License ha ryngkat bad ka jingioh ban sdang noh mardor ia ka kam, ka long kaba be-aiñ bad ka jingpynkheiñ ia katei ka Regulation, la pynpaw u Nongialam ka KHNAM.

U Bah Passah ula ong ba ka jingai iaka kam kontrak ia u bar jylla haba don u trai jylla uba lah ban leh ia ka kam kiba la thep ia ka Tender kadei ka jingpynkheiñ ia ka 3A(b) jong ka Regulation.

“Katei ka kompani kam don satia ia ka ophis treikam ka jongka ha ka jylla Meghalaya bad kala ialam bakla ia ka ICAR da kaba kam ba ka don ia ka ophis treikam ha Khanapara.

Kumta kane ka kompani kan wan ban pan ia ka lisen na ka KHADC hadien ba kan ioh ia ka NOC na ka dorbar shnong. Ngi kwah ban pynpaw ba wat k iDorbar Shnong ruh kidei ban bud ryntih ia ki kyndon jong katei ka Regulation hashwa ba kin ai ia kano kano ka NOC” la pynpaw u Bah Passah.

“Ngi kyntu ia ka KHADC ba kam dei ban ai Trading License ia utei u riewshimet ne kompani ubala pynkhein ia ki kyndon jong ka Regulation 1954, Rules2019 bad ngi kyrpad ia phi ban bthah ruh ia ki bor jongka ICAR bad ban pynbor ia ka ba ym dei ban shah ia kino kino ki bar jylla ba kin sdang ia kano kano ka khaii pateng khlem da ioh shwa ia ka Trading License kaba treikam” ong u Bah Passah.