Shillong Lber 21: U Vice President ka seng saiñ pyrthei Khun Hynniewtrep National Awakening Movement (KHNAM) u Bah Thomas Passah ula dawa na ka sorkar jylla ba kadei ban pynduh noh ia ka Personal Interview khnang ba ki samla kiba dei hok kin ioh ia ka kam ym da ki briew kiba don jingiadei bad ki heh sorkar.
Haba iakren bad ki nongthoh khubor hynne ka sngi, u Bah Thomas ula ong, ka seng ha u snem bala dep kala dawa naka sorkar jylla ban pynduh noh iaka Personal Interview ha kaba iadei bad ka jingthungkam thungjam namar ka ailad ia ki briew kiba don jingiadei bad ki heh ki haiñ ban ioh ia ki kam sorkar.
“Ka sorkar India kala weng iaka Personal Interview bad 23 tylli ki jylla hapoh ka ri India kila weng lut iaka Personal Interview bad na ka liang jongka KHNAM kala phah daka dorkhas ha u bnai Risaw 2022 sha u Myntri Rangbah ka jylla ban weng noh iaka Personal Interview khnang ba jingthungkam kan long kaba itynnad bad ki samla kiba dei hok, kidei ban ioh ia ka kam” ong u Vice President ka KHNAM.
Nalor kane, ula pynpaw ruh ia ka jingbynniaw ba watla ka jylla Meghalaya kala dap 50 snem, hynrei kam don satia iaka Recruitment Policy bad haba ka seng kala iakynduh ia kiba bun ki samla, kila iathuh ba kila leit ban aplai kam haba la mih ka jingpynbna, hynrei ki ioh pat ia ka ‘Call Letter’ hadien 3 snem ia kaba kim lah shuh ban kynmaw ia ka kam kaba ki aplai.
“Ngi kwah ba ka sorkar kan wanrah da ka Recruitment Policy bad kan buh da ka por naduh ba pynmih iaka jingpynbna lait kam, hapoh shi bnai dei ban pyndep iaka Written Test bad dei ban pynbna noh iaka resol hapoh shi bnai ne ar bnai bad hadien kane dei ban thungkam noh mardor” ong u Bah Thomas Passah.
U Vice President ka KHNAM ula pynpaw ruh, kiba bun ki Seat Pule na ka bhah ne Quota jongka sorkar kila sepei lut bad la lap lyngba ka RTI ha u snem 2013 & 2015, ki don bun ki samla ki bym shim la leit ban pule lyngba ka bhah jong ka sorkar jylla ne pyndep iaka jingpule ka jongki.
Ula ong, katei ka jingdkoh kala mih kadei namar ba ka sorkar jylla kam shim la bishar bniah bha ia ka Merit List ne ia ki samla kiba la wan shakhmat ha ka jingpule bad dang shen la sakhi hapoh NEIGRIHMS ba ki samla kiba ioh marks kiba heh kim ioh leit pule hynrei kiba ioh marks barit ki ioh ban leit pule bad dei na kane ka daw ba kim lah ban leit pule pyndep iaka jingpule ka jongki bad la shu pynlehnohei iaka bhah jongka jylla.
Pule lang ia kane: Thwet ki Pulit ia ka Kynthei ba dung da ka tari ia u Samla ha Khyndailad