Shillong, Jymmang 01: Ka Khun Hynniewtrep National Awakening Movement (KHNAM) hynne ka Lah Sngi U Blei kala pynpaw iaka jingdonkam ban pynduh pyndam noh ia ka jingpyntreikam iaka MLA Scheme ha ka jylla.
Kane ka jingdawa ka KHNAM kala mih hadien ba u Symbud Myntri Rangbah ka jylla u Bah Prestone Tynsong ula kren ha ka rynsan ialap elekshon ha Sohiong constituency da kaba ong “Ka MLA scheme kadei tang na ka bynta kito ki nongthep vote bad ki nongkyrshan kiba kyrshan ia ka seng/kyrtong ha ka elekshon bad baroh ki 60 ngut MLA ki leh lang kumtei kumjuh hi”.
“Ka jingkren ka jongu (Tynsong) kala pynpaw shai kdar ba ka T.12.5 Klut kaba ioh da ki MLA kadei tang ka jingai sngewbha jong ki politishan naka bynta ka kam sain pyrthei kaba long pyrshah ia ki kyndon bthah jong ka Election Commission of India,” la ong u Vice President ka KHNAM u Bah Thomas Passah haka kyrwoh khubor.
“Haba peit iaka jingkren u Symbud Myntri Rangbah, ka long kaba dei ban pynduh noh iaka MLA Scheme bad baroh ki kam pynroi dei ban pyniaid lyngba noh na ki ophis jong u BDO, Bor pyniaid District. Lyngba katei ka lynti yn lah ban pynthikna ba ka rukom pyntrei ia ki kam kan long kaba biang, yn pyndep ha ka por iaka jingtrei bad kaban don ruh iaka jingai jingkhein kaba khuid ba suba. Kane kan pynthikna ba ki nongkhaii kin ym shah khring ha ki kam sain pyrthei ban leh ia ki kam khaii pateng” ula ong.
U Bah Passah ula pynkynmaw ba ka jingthmu jong ka MLA scheme kadei ban pynbiang ia ki jingdonkam ha ki shnong ki thaw, ban leh ia ki kam pynroi naka bynta ka jingmyntoi jongu paidbah bad ban weng iaka jingle shilliang khmat haka jingkyntiew iaka roi ka par bad kam dei satia ban kyntiew iaka jingmyntoi haka kam politik kumba la leh haka jylla Meghalaya.
Ula ong, ba la sakhi ba bunsien ki MLA ki pyntreikam ia kitei ki scheme kiba la pynlut naka pisa u paidbah lyngba ka Committee kaba kila thaw bad khlieh hi da u MLA kaba ailad ia ki ban bamsap lyngba kitei ki scheme.
“Haba ngi kren ia ka MLA Scheme ha ki jaka sor, ngi la sakhi ba ka duna bha ka jingjop haka rukom pyntreikam ia kitei ki scheme bad la trei shi trei ia kajuh ka kam, namar ka jingpyntreikam ka long kaba torti bha bad kala long ruh tang ka jingpynlehnoh ei ia ka pisa u paidbah. Ngi la sakhi ruh ba ki MLA kila pynlang ia katei ka pisa baroh 5 snem bad pyndonkam tang ha ka shi snem shwa ka elekshon, kaba pyni shai kdar ba ki pyndonkam ia katei ka scheme tang naka bynta ban myntoi ha ka kam sai pyrthei” ong u Nongialam ka KHNAM.
