Shillong, Lber 13 : Ka Khasi Hills Autonomous District Council (KHADC) kala rai ban dawa ia ka Sorkar Jylla ba kan pynduh pyndam noh ia ka notification u snem 2015, kaba bthah ba ym donkam shuh ban shim Trading Licence na ki District Council.
Haba jubab ia ka motion hapoh ka Dorbar Mang tyngka hynne ka sngi Balang, u CEM ka KHADC Bah Pyniaid Sing Syiem ula ong ba kane ka Notification ka dei kaba pynmih da ka Sorkar u Dr Mukul Sangma ban ailad ia ki Nongkhaii hehspah ba kin pyntrei ia ki kam hashuwa ban shim ia ka Trading Licence na ki ADC ka Jylla.
“Ngi la buddien ia kane ka kam bad ka Sorkar Jylla. Ngin sa kyrpad ia ka Sorkar ban pyndam noh mardor ia kane ka notification” ula ong.
U CEM ula ong ba ka Executive Committee jong u, kala kut jingmut ban nang pynkhlain shuh shuh ia ka Ain Trading Licence ban iada ia ka ioh ka kot jong ki trai riewlum ka Jylla.
Ia kane ka motion la wanrah da u Nongialam ka Liang Pyrshah Bah Titosstarwell Chyne ban iatai halor ka kamai ka kajih jong ki briew hapoh u pud u sam jong ka Council.
Haba iadei bad ka kam ki tourist taxi, u Bah Pyniaid ula iathuh ba ka Council kala khot ia ka jingialang bad ki Tourist taxi ka Meghalaya ha u snem bala lah bad la pynbud da ka shithi ba la phah sha u District Transport Officer (DTO) bad kiwei ki District ba kin nym ai permit ia ki bar jylla, ki bym don ia ka Trading Licence napoh ka Council.
Haba iadei bad ka kam jngohkai, u CEM ula iathuh ba shen ka Council bad ka Sorkar kin sa pynlong ia ka certification program ia ki tour guide ban pynshlur ia ki trai shnong ba kin shim ia ka kam kum ka lad kamai kajih.
U pyntip ba ka Council kala shim ruh ia ki sienjam ban leh eiei halor ka jingeh ba iakynduh da ki paid nongrep bad bynrap b aka Council kala dep ban shna ia ka iew ki nongrep ha Mawryngkneng, Mawsynram bad Pynursla.
