Shillong, Risaw 13 : U AMRI Karbi Royal Council jong u Syiem ki paid Karbi ka Deshdoomreah, kala dawa ia ka Sorkar Meghalaya, ba kan shim biang noh ia ka shnong Deshdoomreah na ka Jylla Assam namar kane ka shnong khappud ka dei kaba dang hap hapoh u pud u sam ka Jylla Meghalaya.
Une u Syiem ki Karbi, Dimoria Raja, Syiem ka Desh Doomreah ula dawa ruh ia ka Sorkar Meghalaya, ba kam dei ban sngap ia ka jingdawa ban shim ia ka jingkwah/mon u paidbah (peoples’ will) bad ka jingsuk ba jan ka synshar khadar (Administrative convenience) ha ka jingiapynbeit ia ka jingiakajia pud bad ka Assam ha kane ka Shnong.
Une u Syiem ki Karbi ula phah ruh da ka dorkhas sha u Symbud Myntri Rangbah ka Jylla Bah Prestone Tynsong ,ba un shimkhia ia ki mat ba ula kdew ha ka jingiapynbeit pud bad ka Assam. Ia kane ka dorkhas la aiti ruh sha u Myntri Rangbah ka Jylla Conrad K Sangma, u Chief Executive Member (CEM) ka KHADC bad u Deputy Commissioner ka Ri-Bhoi.
“Ka jingsngap ia ka mon u paidbah ka dei kaba dang thymmai bad ka jingaram ne jingsuk ba jan ka synshar khadar ruh ka dei kaba dang thymmai” ula ong ha ka dorkhas.
U Dimoria ula ong “ kat kum ka 1st Schedule jong ka Riti Synshar ka Ri, ka Assam Province ka kynthup ia ki Khasi States bad Tribal Area bad ym don satia ki jaka Assamese ba kren halor ka Khasi States. Mynta bala kha ka Meghalaya, ka Assam ka dei ban pynphai noh ia ki Khasi States sha ka Jylla Meghalaya khlem kano kano ka jingiakajia. Nab aka Desh Doomreah ka dei kawei na ki Khasi States, ka Assam ka dei ban pynphai noh sha Meghalaya”.
Ula ong ba kat kum ka histori, ka Deshdoomreah ka dei ka Khasi State haba kdew ia ka Historical and Constitutional Documents of North East India by ML Bose p/96 ( bala aiti lang ha ka dorkhas).
“Haba phai sha ki Jaidbynriew, ki Khasi bad ki Amri Karbi ba ju tip mynshuwa ki Amri Mikir- ki dei ki paid riewlum. U Syiem Khasi ula khein ia u Syiem ka Deshdoomreah kum u para..kumta ha ki por mynshuwa ngi khot “Khrim Recho” Dommarooah Recho Korti (Brother)” ula ong.
Haba maham ia ka Sorkar Jylla ban nym iaid da ka mon u paidbah, ula ong “ Ka mon u paidbah kam dei ban treikam ia ka Deshdoomreah. Namar ka dei ka jaka ki riewlum, ki bar jylla ki dei ki nongshongshnong ba beain bad ym dei satia ban shah ia ki ban iashimbynta ha kaban pynsngew ia ka sur u paidbah namar ba kim don hok satia”.
Ula kyntu ruh ia ka Sorkar Jylla ba kan pyndep noh ia kane ka jingiapynbeit pud hashuwa ka elekshon Lok Sabha 2024 khnang ba ki briew jong u, kin ioh thep vote noh sha Meghalaya kaba dei ka jaka lajong ym sha Assam.
