Dawa ka JNC ia ka JHADC ban mynjur da ka Resolution ban ithuh ia ka ktien Pnar

Shillong, Nailur 24: Ka Jaintia National Council (JNC) kala dawa na ka Jaintia Hills Autonomous District Council (JHADC) ban lum iaka Dorbar Kyrpang ne Special Session ban mynjur ia ka Resolution, kaba kyrpad ia ka sorkar Jylla ban kynthup noh ia ka ktien Pnar ha ka Meghalaya State Language Act bad ban wanrah ia ka ain kaba kyrpang ban iada iaka riti bad dustur tynrai.

Ka kynhun jong ka JNC hapoh ka jingialam u General Secretary u Wanshwa Suting kila iakynduh ia u CEM ka JHADC Bah Thombor Shiwat bad kyrpad ban tuklar lem noh mardor ia kane ka kam.
“Ka JNC kadei kawei na ki sengbhalang na rilum Jaiñtia kaba la dawa na ka sorkar jylla ban ithuh ia ka ktien Pnar, kaba dei ka ktien pdeng ha ka thain, hapoh jong ka Meghalaya State Language Act. Nalor kane ka JHADC kadei ruh ban thaw ia ka ain kaba kyrpang ban iada ia ka riti dustur tynrai khamtam eh kaban ai burom ia ki kmie kaba ngi shim ia ka jait” la pynpaw ka JNC ha ka kyrwoh khubor.
Kala ong ba u CEM ka JHADC ula pyntip ia ka kynhun ba ka Council kala dep ban mynjur ia ki dak thoh ne Alphabet A-B jong ki Jaintia bad ia kane ka rai la dep ruh ban pynbna ha ka Meghalaya Gazette ha u snem 2021.
“U (Shiwat) ula pynkynmaw ba ka mat kaba iadei bad ki dak thoh Jaintia kadei kaba la dep ban aiti sha ka sorkar jylla bad mynta ka don hapoh ka tand Ain ba kan khmih bniah haba kular ban buddien ia kane ka kam ha kine ki sngi ban wan, kaban long ka jingmyntoi ia baroh ki paidbah ka rilum Jaiñtia.”
Ka JNC kala banjur ia ka jingdonkam ia ka JHADC ban sdang pyndonkam noh ia ki dak thoh Jaiñtia ha ki kot ki sla kiba iadei bad ka histori, ki kam kiba iadei bad ki ain ki kanun bad haba pynmih ia kino kino ki jingpynbna paidbah. Ka JHADC kadei ban wad ia ki lad ki lynti ban ban wanrah noh ia ki dak thoh Jaintia khamtam ha ki skulkiba hap hapoh ki jingkhmih ki jongka.
Ka seng kala pynpaw ruh ia ka jingkongsan jong ka JHADC ban mynjur ia ka Resolution ban kyntu ia ka sorkar jylla ban ithuh noh ia ka ktien Pnar kum kawei na ki Official Languages ne ktien Sorkar ha Meghalaya da kaba pynrung ha ka Meghalaya State Language Act.