Shillong, Iaiong 27 : Ka Jaintia Coordination Committee for Reservation Policy (JCCRP) kala dawa ia ka Sorkar Jylla ban shong bishar thymmai ia ka State Reservation Policy ka Jylla.
Ka JCCRP ka dei ka kynhun jong ki Khlieh Nongsynshar ba kynthup ia ka Synjuk Waheh Chnong Ri Jainita bad ka Synjuk Waheh Chnong Jowai lem bad ki kynhun Sengbhalang kata ka JSU, JYF, JSM bad EJNC.
Ha ka shithi bala phah sha u Myntri Rangbah ka Jylla Conrad K Sangma myn ha ka 25 tarik Iaiong, ka JCCRP kala ong “Ngi dawa jur ia ka Sorkar Jylla ym ban pynreikam ia ka Roster System naduh ka por baka Reservation Policy ka sdang treikam”.
“Ha ka jingshisha ngi kwah ban ai jingmut ia ka Sorkar Jylla ban sngewbha bishar thymmai bad pynkylla ia ka Reservation Policy 1972 kaba la rim bad bym iahap shuh” kala bynrap.
Ka JCCRP kala kynnoh ruh ba ka Reservation Policy kaba mynta ka dei kaba lah shilliang ia katto katne ki jaidbynriew bad ong “…ha ka jingshisha ki parashnong jong ngi ki Garo kila myntoi bha na ka 40% ka bhah jong ka Reservation Policy katba ngi ki Khasi bad Jaintia ngi hap ban iaknieh hapdeng jong ngi namar ka jingioh tang 40% ka bhah bad ka por kala dei ia ka Sorkar ban sdang bad shong bishar ia kane ka policy kabym iahap shuh khnang ba kan ai jingmyntoi ia baroh lai tylli ki jaidbynriew ka Jylla”.
