Shillong, Naitung 25 : Ka Hynniewtrep Youth Council (HYC) kala dawa ban leh tyngeh noh pyrshah ia kito ki samla pule MBBS ki bym shym la wanphai sha Jylla ban shakri ia ka Sorkar hadien ba pyndep ia ka jingpule bad ai jingmut ruh ba dei ban pynkiew noh ia ka bond sha ka T. 1 klur, ka ban treikam naduh ka samoi pule 2026-27.
“Ngi la dawa ia ka Sorkar ban leh da kaba tyngeh pyrshah ia ki samla pule kiba lehtam bad kumjuh ruh iaki samla pule kiba dang leit pule mynta, da kaba phah siew lut ia ka bai klas nalor ka sut sha ka Sorkar Jylla lada kim lah ban pyndep ia ka bond-cum-agreement ba kila iasoi” ong u President ka HYC Roy Kupar Synrem haba iakren bad ki lad pathai khubor hadien ka jingaiti ia ka dorkhas sha ka Myntri ka Koit ka Khiah Kong Ampareen Lyngdoh ha ka sngi Thohdieng.
“Ngi kyntu ruh ia phi ban kyntiew noh ia ka bond sha ka T. 1 klur, ka ban treikam naduh ka samoi pule 2026-27, ba kin leit pule MBBS na ka bhah ka Sorkar Jylla bad ba ki dei ruh ban wan shakri khlem pep haduh san snem sha ki jaka nongkyndong” ula bynrap.
Kane ka jingdawa kala mih haba pynshong nongrim ia ka jingshem RTI, kaba pynpaw ba hapdeng u snem 2015-16 bad 2019-20, ka Sorkar Jylla kala bei tyngka ia 359 ngut ki samla pule MBBS ha kylleng ki jaka pule ka Ri.
Wat hadien ba kila pyndep ia ka jingpule, 96 ngut ki samla pule kim shym la wanphai bad pyntip sha ka Sorkar ba kin pyndep ia ki kyndon jong ka bond, kaba donkam ia ki ba kin shakri sha ki jaka nongkyndong la kumno kumno ruh haduh 5 snem.
Kat kum ka RTI, ka Ophis u Director ka Health Services (MI) kala phah notice sha kine ki samla pule ha ka 8 tarik Risaw, 2024 bad 2 tarik Iaiong 2025, hynrei kim shym la jubab satia.
Ha kajuh ka por, ka HYC kala kyntu ia ka Sorkar ba kan pyndap noh ia ki post kiba lait thylli jong ki Doktor, Specialist, paramedical staff, nursing staff, bad ministerial staff ha kylleng ki CHC, PHC bad Sub Centre kiba don ha kylleng ka Ri-lum Khasi bad Jaintia.
Haba sot ia ka RTI, u bah Roy Kupar ula ong ba ki don bun tylli ki kam kiba lait jong ki doktor, Specialist, paramedical staff, nursing staff, bad ministerial staff ha kylleng ki CHC, PHC bad Sub Centre. Kumba 8 tylli ki kam doktor, 7 tylli ki kam doktor specialist, 10 tylli ki kam paramedical staff, bad 100 tylli ki kam nurse bad ministerial staff ki lait mynta.
Watla ki kyndon ka Sorkar ki kren shai ba man ki CHC ki dei ban don 4 ngut ki doktor bad 6 ngut ki specialist, bad man ki PHC ki dei ban don 2 ngut ki doktor, pharmacists bad lab technician, hynrei bun ki CHC bad PHC ki duna bha ki nongtrei, ula ong haba kdew ba kine ki kam kiba lait kila pyllong ia ki CHC bad PHC ba kin nym lah ban shakri bha ia ki paidbah.
Ka HYC kala kyntu ruh ia ka Sorkar ban buh noh ia ka dialysis unit/centre ha ki hospital Sorkar bad ki CHC ha kylleng ka ri-lum Khasi Jaintia ban iarap ia ki nongpang.
 kala dawa ban leh tyngeh noh pyrshah ia kito ki samla pule MBBS ki bym shym la wanphai sha Jylla ban shakri ia ka Sorkar hadien ba pyndep ia ka jingpule bad ai jingmut ruh ba dei ban pynkiew noh ia ka bond sha ka T. 1 klur, ka ban treikam naduh ka samoi pule 2026-27.){kind=link}