Nongstoin, Rymphang 29 : Ka Hynniewtrep Youth Council- West Khasi Hills, kala dawa ia u Deputy Commissioner ka District Bah Garod LSN Dykes, ba un khot pynlong noh ia ka eksam District Selection Committee (DSC) ban thungkam noh ia ki samla ha ki kam bapher bapher kiba lait hapoh ka District.
Kane ka seng hapoh ka jingialam u President samla Lumlang Kharsyiemlieh, kala leit iakynduh ia u Deputy Commissioner hynne ka sngi Palei bad aiti ia ka dorkhas halor kane ka kam.
“Ngi iohi ha ki lad pathai khubor ba ka DSC ka Eastern West Khasi Hills kala pyllait ia ki jingpynbna laitkam bapher bapher. Ka DSC, WKH ruh ka dei ban pynmih noh ia ka jingpynbna laitkam bad ban pyniaid ruh kat kum ka bhah thungkam ba 80% ia ki Khasi bad Garo bad 20% ia ki Unreserved” ong kane ka Seng.
Kala ong ruh ba u Myntri Rangbah ka Jylla Conrad K Sangma dang ha ka Dorbar Mang Tyngka bala dep, ula iathuh ba ki Deputy Commissioner jong ki District bapher bapher ki dei ban pyniaid noh shakhmat ha kaban pynlong ia ki eksam bad Interview thep kam jong ki DSC khlem da donkam shuh ban phah sha ka tnad Personnel khnang ba kan kloi ka jingthungkam.
“Ngi sngewthuh ba u CM ula aibor ia ki DC ba kin leh ia kaba donkam. Ngi ngeit bad ngi kyrmen ba u DC ka WKH ruh un pynmih noh ia ka jingpynbna laitkam bad ban pynlong kloi ia ka eksamin thungkam” kala ong.
Kane ka Seng ka iathuh ba u Deputy Commissioner ula kular ban shimkhia ia kane ka dorkhas haba pyntip ba ka ka Ophis kan sa pynkhreh noh shaid shaid ban leh ia kaba donkam.
