Shillong, Naitung 29: Ka Hynñiewtrep Youth Council (HYC) ka la kyntu ïa u Lat ka Jylla CH Vijayashankar ban iakren bad ka Sorkar Pdeng halor ka jingdawa ban buh noh daka ophis NCB kaba pura ha Meghalaya, ban pynkynriah ïa ki nongshong shnong beaiñ na Lum Survey bad kiwei kiwei ki mat kiba ktah ïa ka ioh kam ioh jam, ka koit ka khiah, bad ka shong suk shong saiñ haka Jylla.
Ha ka dorkhas bala aiti sha u Lat ka Jylla, HYC ka la ong ba ka jingdih drok ka la kylla long ka jingeh ha ka imlang sahlang bad ka jingdon ka Meghalaya ha khappud kala pynlong ïa ka Jylla kum ka jaka pyniaid lynti ia u drok.
Ka HYC kala kyrpad ia u Lat ban iakren bad ka Ministry of Home Affairs ka Sorkar Pdeng ban buh noh ia ka Zonal Office kaba pura jong ka Narcotics Control Bureau ha Meghalaya.
Ka Council kala ban jur iaka jingdonkam jong ka ïatreilang kiba kham khlaiñ hapdeng ka NCB, ki BSF, ki pulit jong ka jylla bad custom bad ban pynkhlain ïa ka jingpeitngor ha ki jaka rung jong ka Jylla.
Haba iadei bad ka ki jaka puta, ka HYC ka la kdew ia ka jingbteng jong ka jingdon kiba buhai shnong beain ha Lum Survey, mar pyrshah ia ka Fire and Emergency Services Station ha Iewduh, ha ka jaka ba dei trai da ka ophis Defence Estate.
Ka la ong ba katei ka thain ka iakynduh jingeh halor ka jingkhuid jingsuba, ka jingwan buhai shnong beain bad ki kam kiba iadei bad u drok bad kiwei ki kam beain.
Ka la kyrpad ia u Lat ban rah ia kane ka mat shaka tnat Ministry of Defence and Ministry of Home Affairs ban pynshisha iaki briew bad haka juh ka por ban weng iaki ba sah beain.
Ka HYC ka la pynpaw ruh ïa ka jingkynnoh ba ym shym la pyntreikam ïa ka Reservation Policy ha ki Ophis treikam jong ka Sorkar Pdeng ha Meghalaya.
Da kaba kdew ia ki kyndon jong ka DoPT, ka la ong ba ym shym la bud ia ka bhah ba la buh kaba long 1% na ka bynta ki SC, 44% na ka bynta ki ST bad 5% na ka bynta ki OBC ha ka jingpynrung kam ha ka thup C bad D.
Ka la kyntu ia u Lat ban iakren bad ka Department of Personnel & Training na ka bynta ban bud ryntih iaki kyndon bala buh.
Ha kaba iadei bad ka koit ka khiah, ka HYC ka la ong ba ka NEIGRIHMS ka dei ban pyntreikam iaka Female-to-Male Ratio naka bynta ban thungkam Nurse kumba leh kiwei ki jaka sumar ban iada ia ka burom jong ki nongpang khamtam iaki kynthei bad khynnah.
Ka la kyrpad ia u Lat ban iakren bad ka Ministry of Health & Family Welfare ka Sorkar Pdeng ban ioh ia ka jingmynjur ia kane ka policy naka bynta ban pyntreikam ha Meghalaya.
Kala ong ba kine ki mat ki dei kiba iadei bad ka jingshngain jong ki samla, ka hok riti synshar jong ki jaidbynriew trai ri bad ka jingbha jong ka jingshakri paidbah.
 ka la kyntu ïa u Lat ka Jylla CH Vijayashankar ban iakren bad ka Sorkar Pdeng halor ka jingdawa ban buh noh daka ophis NCB kaba pura ha Meghalaya, ban pynkynriah ïa ki nongshong shnong beaiñ na Lum Survey bad kiwei kiwei ki mat kiba ktah ïa ka ioh kam ioh jam, ka koit ka khiah, bad ka shong suk shong saiñ haka Jylla.){kind=link}