Shillong, Lber 20 : Ka Hynniewtrep Youth Council (HYC) hynne ka sngi Palei kala dawa na ka sorkar jylla ban phah tohkit ha ka Fact Finding Team ia ka jingdon ki khynnah shynrang bad kynthei jong ka jylla, kiba la shah ialam ha ki kynhun ban ioh leit skul ei shabar ka Jylla.
Kane ka jingdawa, kad ei hadien ba la mih kawei ka jingjia ba ki khynnah skul kila ioh ia ka bam kaba la sniew (food poisoning) ha jylla Karnataka, ha kaba 2 ngut ki khynnah skul na Meghalaya kila duh noh ia ka jingim.
Ha ka shithi kaba la phah sha u Myntri Rangbah ka jylla Conrad K Sangma, ka HYC kala ong, ba ka jingiap ki 2 ngut ki khynnah na ka jylla ka dei namar ka jingioh ia ka bam kaba la sniew ha ka skul kaba don ha ka jylla Karnataka bad ka jingshah pynkit sha hospital ia bun ngut kiwei pat kiba na kajuh ka skul, ka long kaei kaei kaba dei ban shimkhia bha da ka sorkar jylla bad kito kiba don ia ka jingkitkhlieh ki dei ban shah pynshitom bad ban shah leh da kaba tyngeh katkum ki kyndon ain.
“Ka long kaba donkam kyrkieh ban don da ka jingtohkit kaba bniah da ka Fact Finding Team ka jylla, ban lap ia ka jingdon katno ngut ki khynnah shynrang bad kynthei kiba la shah ialam ha ka kynhun ne ki seng ban leit skul ei shabar ka jylla” pynpaw ka HYC.
Ha ka shithi la ban jur ruh ban lum kyrteng ia ki kynhun ne ki seng ryngkat bad ki nongkitkam ki jongki bad ki phone number hapoh ka jylla kiba shim ia ka jingkitkhlieh ban ialam ia ki khynnah sha ki skul, ka kyrteng bad ki jingtip kiba bniah jong ki khynnah kiba la shah ialam ha kitei ki kynhun ne ki seng ne ka Agency, ka kyrteng bad ki jingtip ia ki jaka pule kiba kitei ki khynnah ki leit pule, ka jingtip shaphang ka jaka, jaka sah ba la buh ia ki khynnah bad ka jingbuddien ban pynthikna iaka jingshngain jong ki khynnah kiba na ka jylla kila leit pule bad sah ha ki jaka pule shabar.
“Kane ka long kaba kongsan ban pynthikna ba ka jingim jong ki khynnah ym dei ban shu duh noh ha ka jingjia kaba ym lah ban poi pyrkhat bad dei ban don ia ka rukom treikam kaban pynshitom ia ki briew kiba la shim ia ka jingkitkhlieh na ka bynta ka jingshngain bad ia ka bha ka miat jong ki khynnah pule” pynpaw ka HYC.
Ka HYC kala ban jur ruh ia ka jingdonkam ba ka sorkar jylla kan shimkhia thikna ia ka kaiphod jingtohkit jongka Sanjana Chappali ka ‘TEHELKA’ titled “A Strange And Bitter Crop” kaba la pynmih ha u snem 2009 kaba batai ia ki jingshisha halor ka jinglong jingman jong ki khynnah kiba la ialam da ka RSS bad ki kynhun kiba iatreilang bad ka, sha Karnataka.
“Katkum ka kaiphod, kumba long mynta, kila don palat 1000 ngut tam ki khynnah na kylleng ki District jong ka jylla kiba la ioh leit skul ei ha kylleng ki bynta jong ka ri India na katei kajuh ka seng, kumta ia ka jingshngain bad ka bha ka miat jong ki khynnah dei ban buh hakhmat eh da ka sorkar jylla” ong ka HYC.
“La kyrpad ruh ba lada don ki kmie ki kpa ne ki bahaiing bahasem, kiba kwah ban wan ialam noh iala ki khun sha la iing hynrei kim lah ban leh ia katei namar ka jingkyrduh pisa, ka Sorkar ka dei ban shim ia ki sienjam ban pynthikna ia ka jingwanphai ba ka dei ban long kaba shngain” ong ha ka shithi.
