Shillong, Nailar 08: Ka Hynniewtrep Youth Council (HYC) hynne ka sngi Ba-ar, kala dawa naka sorkar jylla ban tei daka Shillong Campus jong ka Captain Williamson Sangma State University bad ban tuklar daka ba thaw ain ban khmih iaka jingrem ka bai klas haki jaka pule sorkar bad ki jaka pule ki bym ioh jingiarap naka sorkar.
Haka dorkhas bala aiti ha u Myntri ka tnat pule puthi Rakkam A Sangma, U General Secretary ka HYC Roykupar Synrem ula ong ba halor ka jingmih ka jingpyrshah ban pyntreikam iaka NEP 2020 bad ka jingeh ki samla pule ban ioh Admission ha NEHU naka ka jingpyntreikam iaka CUET, ka long kaba kyrkieh iaka sorkar jylla ban shim ki sienjam ban wanrah noh daka State University hapoh ka nongbah naka bynta ka jingmyntoi ki samla pule.
Kane kan wanrah ruh iaka lad ioh kam ioh jam naka bynta ki paidbah ka jylla.
Haba pynpaw ba dang shen ka sorkar jylla kala plie paidbah iaka Captain Williamson Sangma State University ha Garo Hills in Garo Hills, u bah Roykupar ula ong “Ngi dawa naka sorkar ban shim khia mardor ban wanrah ka jingsynshar kaba jan bad ki paidbah daka ba wanrah noh daka ophis Regional Campus/Office hapoh ka jingkhmih da u Pro-Vice Chancellor bad ka ophis Registrar ba pura ha Khasi-Jaintia Hills region.”
U bah Roykupar ula ong bana ka liang u Myntri ka tnat pule ula kular baka sorkar shen kan wanrah noh iaka Shillong Campus jong ka Captain Williamson Sangma State University ha Shillong.
Haba pynpaw iaka jingdonkam ban pyrrkhing iaka bai klas haki jaka pule sorkar bad haki jaka pule riewshimet, u bah Roykupar ula ong “Ngi ai jingiaroh iaka jingshakri ka sorkar ban kyntiew iaka pule puthi hapoh ka jyll hynrei ngim dei ruh ban klet ba kala donkam ban don daki ain ban pyrkhing iaka jingrem palat ka bai klas ban pynthikna ba baroh ki ioh lad ban leit klas. Ka jingpuel kadei ban ioh lut da baroh ki samla bad dei namar kane donkam ban don daki kynja ain ban pyrkhing iaka jingrem palat ka bai klas”.
Ka HYC ka kyntu ruh iaka sorkar ban ai jingkyrshan daka song pisa naka bynta ki jaka pule ha baroh kawei ka jylla ban pyntreikam iaka National Education Policy (NEP), 2020.
“Namar kane ngi kyntu iaka sorkar ban iarap iaki jaka pule naka bynta ban pynshlur iaki samla ban bteng iaki jingpule bad haka juh ka por ban pyllait iaki kmie ki kpa haka jingshah ram bad ban pynthikna ba ka jingpyntreikam iaka NEP ka iaid beit iaid ryntih” la ong u bah Roykupar.
Nalor kane u general secretary ka HYC ula ong ba ka Council kala dawa na u myntri ban shim iaki sienjam haba iadei ban buh daki jaka thoh eksamin lane ki CUET centres ha baroh ki district ka jylla. Haduh mynta ki samla pule ka Meghalaya ki shem jingeh haba iadei bad ki jaka thoh eksamin namar bun ki samla ki hap ban thoh eksamin sha bar ka jylla.
Ula kyntu iaka sorkar ban sdang noh iaka tnat pule Aptitude and Logical Reasoning kum kawei ka tnat pule naduh ki skul.
“Kane ka pynkreh iaki samla pule namar kane kadei ka sobjek kaba donkam bha hadien habud ba ki thep kam bad dei namar kane ka seng kala kyntu iaka sorkar ban sdang noh ia kane ka Sobjek pule naduh ki skul” ula ong.
Nalor kane ka HYC kala kyntu ruh iaka sorkar jylla ban wad lad kumno ban iarap ia kumba 200 ngut ki samla pule kiba pule sha Manipur ban bteng biang iaki jingpule jong ki.
U bah Roykupar ula ong ba ka jingiakynnad ha Manipur kam shym la iohi ban poi shaka jingkut bad ki don kumba 200 ngut ki samla pule kiba pule ha kane ka jylla bad kane ka jingiakynnad ha kane ka jylla kan wanrah ka jingktah iaka lawei ki samla pule.
“Kila duh iaki snem pule kumba 3 bnai tam. Dei namar kane ngi la kyntu iaka sorkar ban shim ki sienjam ban iarap iaki samla pule ban ioh bteng biang iala ki jingpule katkum ka jingdon ki tnat pule hapoh ka jylla lane sha kiwei pat ki jylla naka bynta ban pynthikna ba ka lawei ki samla pule kiba pule ha Manipur kim dei ban shah ktah” ula ong.
Pule lang ia kane: Manipur : Iakhih ki Kynthei Meitei pyrshah ia ki shipai Assam Rifles
Peit lang ia kane
