Shillong, Naitung 25: Ka Hynniewtrep Youth Council (HYC) kala ai por 7 sngi iaka Khasi Hills Autonomous District Council (KHADC) ba ka dei ban khang tala iaka karkhana sain jri Resource Rubber Private Limited kaba don ha 11 Mer, Mawsmai, Ri-bhoi District jong u Joginder Pal Kapoor.
Ia kane la pyntip da u President ka HYC u Bah Roy Kupar Synrem hadien ka jingiakynduh ia u Executive Member (EM) ba khmih iaka tnat Trade u Bah Gigur Myrthong.
Haba kren sha ki lad pathai khubor, u Bah Roy ula iathuh ba naka liang u EM ula pynksan ba ki kot ki sla jong u Joginder Pal Kapoor ki dei kiba la kut naduh u bnai Iaiong 2024.
U Bah Roy ula pynksan ba ka jingleit khang tala ka HYC iaka karkhana Resource Rubber Private Limited ka dei namar baka District Council ka khlem leh iala ka kamram hynrei kaba lyngoh, ba ki Pulit hynnin ka sngi, kila leit pynpait iaka tala.
“Ka KHADC kaba thaw iaka ain, hynrei kaba lyngoh pat, ki bor pyniaid ka Council, ki khlem leh iaka kamram ban leit khang tala, watla ki kot ki sla jong kane ka karkhana, kila kut naduh u bnai Iaiong 2024” ong u Bah Roy Kupar.
U President ka HYC ula ong ba ka jingleh jong ki bor Pukit ka Ri-bhoi District bad u Joginder Pal Kapoor ka long kaba be-ain bad kaba long pyrshah iaka Regulation of Trading by Non-Tribal 1954.
“Ka Section ba 3 jong ka Regulation Trading by Non-Tribal 1954 ka kdew shai ba kino kino ki bar Jylla kiba kwah ban khaii ki donkam ban ioh iaka Trading License napoh ka District Council” ula ong.
U Bah Roy Kupar ula ong ba lada ki bor pyniaid ka KHADC, kim lah ban pyntreikam iaka ain ba la thaw hi, kam don jingmut ban don ka ophis jong ka Council ha Nongbah Shillong.
