Shillong, Iaiong 11 : Ka Hynniewtrep National Youth Front (HNYF) hynne ka sngi Ba-ar kala ong ba ka jingpyntreikam ia ka roster system ka dei ban long naduh ba shim rai ka Sorkar ia ka roster ym naduh u snem 1972.
Haba iakren bad ki nongthoh khubor, u President ka HNYF Bah Sadon K Blah ula ong ba ka Sorkar Jylla ka dei ban wanrah ia ka policy ka ban pynthikna baka roster system ka dei ban treikam nangne shakhmat ym kaba sdang naduh ka por bala leit noh.
Ula ong ba ka Iingkashari Meghalaya High Court ha ka hukum ba ka pynmih halor kane ka kam, kam shym la kren halor ka roster system ba kan sdang treikam naduh ki snem bala leit noh.
Haba kylli halor ka jingdawa ban bishar thymmai ia ka State Reservation Policy, u Bah Sadon ula ong “Kat kum ka Riti Synshar ka Ri, ka Reservation Policy ka dei kaba thmu tang na ka bynta 10 snem bad bun ki huum jong ka IIngkashari Supreme Court ka ong ba ka jingai bhah kam dei ban long palat ia ka 50%. Namar kata, lada ngi pyrshang ban wanrah ia ka ain ban bishar thymmai ia ka policy, ka lah ban khring ia ka jingtuklar jong ka Iingkashari bad kane kan sa ktah jur ia ka Jylla”.
Ula kyntu ia baroh kiba don ka jingsngewkhia ba kin tip ia ka hukum jong ka Iingkashari Supreme Court haba phai sha ka jingai bhah.
Kat kum ka jingong jong u, lada mynjur ia ka resolution hapoh ka Iingdorbar Thaw Ain, khlem pep kan khring ia ka jingtuklar ka Iingkashari, kaba la ieng ha ka nongrim b aka jingai bhah la ka long kumno kumno ruh kam dei ban palat ia ka 50%.
Pule lang ia kane: Khlad u heprit bad mynsaw ki bahaiing ba bhen u diengbah ha Umling
