Shillong Lber 31: Ka Hynniewtrep Integrated Territorial Organisation hynne ka sngi kala phah da ka dorkhas sha u Deputy Commissioner ka East Khasi Hills, ba um dei ban ai jingbit ia ka MLMDF ba kan pynlong ia ka jingiakhih da kaba iashong kyllain mungor ha nongbah Shillong.
U President ka HITO Bah Donbok Dkhar ula pynpaw ba ka seng ka pyrshah jur ban ai jingbit ia ka MLMDF hapoh ka jingialam u SK Choudhary, ban pynlong ia ka jingiashong kyllain mungor halor ka jingshah pyniap jong ki ar ngut ki bar jylla ha Ichamati, Shella.
“Watla ka dei ka hok jong ki paidbah ban pynlong ia ka jingiakhih, hynrei ban pynlong ia ka jingiakhih kaba jai jai ha kum kane ka por ka lah ban nang ai ding bad kan pynmih ia ka jingsngew iapher jaidbynriew ha ka jaka ka jong ngi” ula ong.
“Ngi kyntu ia ki jaidbynriew ki bym dei Khasi ba ki dei ban sngewnguh ia ka jingshisha ba ki paid Khasi kila iai bteng ban iakhun na ka bynta ka hok ka jongki mynta la palat 76 snem (1948-2024) ha kaba kila mad ia ka jingeh na ka jingshah knieh iaka khaii pateng bad ka kam sain hima sima ha ki briew kiba nabar bad na ka jingbym pynurlong ia ka jingkular ka ri ia ka jingiatehkular ha kaba iadei bad ka Annexed Agreement hapoh jong ka jingbuh ia ki kyndon jongka Instrument of Accession kaba la iasoi bad mynjur da ka sorkar India bad ki paid Khasi mynta la 76 snem” ong u Bah Dkhar.
Ula ong, ba ka National Commission for Schedule Tribes (NCST) ha u Iaiong 2012 kala phah ia ka jingbthah ia ka Ministry of Home Affairs bad Ministry of Tribal Affairs jong ka Sorkar India ban pynrung ia ki kyndon jongka Annexed Agreement ha ka riti synshar ka ri hynrei haduh mynta la kyntait ban leh ia katei da ka sorkar pdeng bad sorkar jylla bad kila pynlong kamkai ia ka Article 338A jong ka riti synshar ka ri India.
Ka jingbym pyndep ia katei ka jingiatehkular kala wanrah iaka jingbym shngaiñ ia ki paid riewlum Khasi bad kumta ki iai bteng ban pynlong ia ki jingiakhih bad ban bteng ban iakhun ha ka lynti jong ka ri synshar paidbah.
“Ka HITO kam pyrshah iaka MLMDF ban pynlong ia ka jingiakhih bad kadei ka hok lyngba ka riti synshar ka ri ban pynlong ia ka jingiakhih kaba jai jai halor kano kano ka mat, hynrei lada ailad ba ka MLMDF ban pynlong ia katei ka jingiakhih, ngi ki HITO ngi kwah ban pan jingbit lang ban ialum ban pynlong ia ka jingiakhih kaba jai jai ban dawa ia ka hok halor ka jingshah pyniap u (L) Lurshai Hynniewta ha katei kajuh ka sngi bad ka juh hi ka jaka kaba pynlong da ka MLMDF ha Shella, Sohra ne Shillong” la ong u Donbok Dkhar.
Ka HITO ka pyrshah jur bad pynrem jur iaka jingkynnoh ka CWC pyrshah ia ka KSU, katba ki pulit kim pat ioh ia ki sakhi ne sabut ka long kaba kloi eh ban kynnoh ba ki riewlum kila leh ia katei ka kam thombor kiba la jia ha kylleng ka jylla pyrshah ia ki jaidbynriew Bengali, ym lah ban tip ba ka lah ban dei ruh ka kam kaba la leh da kiwei pat ban pynjah burom ia ka jiadbynriew Khasi, Jaintia bad Garo.
