Shillong Jymmang 19: Ka Hynniewtrep Integrated Territorial Organisation (HITO) hynne ka sngi u Blei, kala phah da ka dorkhas ia u Myntri Rangbah ka jylla u Conrad K Sangma dawa ba dei ban pyllait noh ia ka jylla Meghalaya na ka eksam Common University Entrance Test (CUET) bad kadei ruh ban pynmih ia ka jingpynbna sha baroh ki School bad College bym donkam ban pynshong nongrim ia ki ‘Marks’ CUET na bynta ban pynrung klas ia ki samla pule.
U President ka HITO u Bah Donbok Dkhar ha ka shithi kaba la phah sha u Myntri Rnagbah ula pynpaw, ba ka jylla kam shym la long kaba la pynkhreh ban pynlong ia katei ka eksam CUET kaba la lam sha ka jingeh kaba khraw ia ki samla pule khamtam eh ia kito kiba wan na ki thain nongkyndong ha kaba iadei bad ka jingpynlut pynsep. Ka jingbym biang ki jaka bad ki kamra thoh eksam kala pynmih iaka jingduna bad jingdkoh bad kumjuh ruh kala ktah bha iaka jinglut jingsep jong ki khynnah pule kiba don iaka jingthrang ban pule.
“Ngi ngeit ba ka long ka bym iahap ban pyntreikam ia ka polisi khlem ka jingpynkhreh ba tikna. Ka jingjia kaba dang shen kala pyni shai kdar ba ka Meghalaya kam pat long kaba la pynkhreh ban pynlong iaka eksam CUET. Wat la katta ruh, hynrei ka sorkar kala iaid shakhmat bad kane ka eksam, kaba la wanrah ia ka jingkulmar khlieh ia ki khynnah bad kala long ruh ka jingpynleh noh ei kai ia ka por bad ka pisa” ong u Bah Donbok.
Ula ong, ba ha ki snem kiba la dep, ka seng kala iakren sani bad u Myntri ka pule u puthi u Bah Lahkmen Rymbui halor ka jingdonkam ban pyllait noh ia ka jylla na ka eksam CUET bad ula ai ruh ia ka jingkular ba ka jylla kan lait na katei ka eksam, kumta ka sorkar kadei ban burom ia katei ka jingkular.
“Ngim pyrshah ia ka jingdonkam ki samla pule ban iakhun ia ka eksam CUET ban ioh leit pule shabar ka jylla. Hynrei ngi kyntu jur, pat ba dei ban pyllait noh ia eksam CUET na ka bynta ki jaka pule kiba don hapoh ka jylla Meghalaya. Ngi kyntu ruh ia ka sorkar jylla ba kan pynmih ia ka jingpynbna paidbah ia ki skul bad college kiba don ha kylleng ka jylla, ban pynshai ba ki samla pule kim donkam ban pyni ia ki mark CUET haba ki leit ban thep klas ha ki jaka pule kiba don hapoh ka jylla” la pynpaw u President ka HITO.
Ula ong, ba ka long kaba donkam ban pynpaw shai kdar ba ba tang ki samla pule kiba kwah leit pule shabar ka jylla ki donkam ban leh ia ka eksam CUET.
Ka HITO kala pynpaw ruh ba ka shaniah skhem ha ka sorkar jylla ba kan pdiang ia ki jingdawa ki jongka bad ban shim ia ki sienjam kiba mardor ban pyllait noh iaka Meghalaya na ka eksam CUET bad ban weng noh ia ka jingdonkam ia ki marks CUET ban ioh ia klas pule ki samla ha ki jaka pule kiba don hapoh ka jylla.
