Shillong, Jylliew 04: Ka Hynñiewtrep Integrated Territorial Organisation (HITO) ka la kyntu ïa ki bor district Ri-Bhoi ban teh kyndon ïa ka jingwankit ïa ki sniang nabar shapoh ka Jylla.
Ha ka shithi sha Deputy Commissioner (DC) Ri-bhoi District, ka HITO ka la ong, “Ngi kyntu ban pyntreikam ïa ki kyndon kiba kham pyrkhing bad ka jingpeitngor na ka bynta ka jingwankit ïa ki sniang shapoh ka jylla. Kane kan kynthup ban pyni ïa ki kot jingpynshisha (Health Certificate) naki Ophisar ka Tnat Veterinary haki jaka rung shapoh ka Jylla bad ban khang wanrah Sniang na bar lada kmi bud iaki kyndon”.
Ka HITO kala ong ba ka jingbym pyrkhing iaka jingwan pynpoi iaki Sniang na bar ka Jylla kiba la shah ktah ha ki jingpang, ka buh jingma shibun ia ka koit ka khiah jong ki nongshong shnong ka jylla Meghalaya.
Kala ong ba khlem ka jingpeit bniah bad ki kot ki sla kiba biang jong ki doktor mrad, ym lah ban pynthikna ba ki sniang ki long kiba lait na ki jingpang kum ka jingpang swine flu kaba lah ban don ka jingma kaba khraw ia ka koit ka khiah jong ki mrad bad ia ka jingshngain jong ki paidbah.
“Ka jingshngain bad ka jingbha jingmiat jong ki paidbah ka Meghalaya ka long kaba kongsan tam, bad ngi ngeit ba dei ban shim ia ki lad ki lynti kiba kham kloi ban weng ia kane ka jingeh kaba lah ban mih ha ka koit ka khiah jong ki paidbah” ka la bynrap.
