Shillong, Nohprah 05: Ka seng Hynniewtrep Integrated Territorial Organization (HITO) hynne ka sngi kala dawa naka sorkar ban sangeh shi syndon iaka jingiakren pynbeit pud bad ka jylla Assam.
Haka shithi ba la phah sha u Myntri Rangbah ka jylla Conrad K Sangma, u President ka HITO Donbok Dkhar u la ong ba kane ka jingdawa sangeh iakren pynbeit pud kadei namar ba ka jylla Assam kala pyrshang ban knieh ne kyntur pud wat shabar na ki 12 tylli ki jaka ba iakajia.
U bah Donbok u la ong ba ka jingkyntur bad ka jingsiat iap ia ki 6 ngut ki briew da ki Pulit Assam haka step jong 22 tarik Naiwieng ka paw shai ba ka Assam ka pyrshang ban knieh ne kam trai wat iaki jaka ki bym dei ki jaka iakajia hapdeng Meghalaya bad Assam.
“Ka jingiakren pynbeit pud hapdeng ka Meghalaya bad Assam dei ban sangeh noh bad iaka Memorandum of Understanding (MoU) ba la iasoi hapdeng ki 2 ngut ki Myntri Rangbah ka jylla dei ban pyndam noh” la ong ka dorkhas.
U bah Donbok u la dawa ruh ba ka sorkar jylla kadei ban pynieng ktem Pulit ha baroh ki thain khappud katkum ka rai lane ka ‘Executive Decision’ jong ka sorkar Meghalaya bad Assam ba la shim naduh 1983.
U la ong ba ka sorkar jylla kadei ban pynieng ktem pulit hapoh ka shnong Jrikyndeng ha Block-1 bad ha Block-2 ki ktem Pulit kidei ban don ha Jatalong and Sabuda bad sa kiwei de ki ktem Pulit kum ha Mokailum.
U la ong ruh ba ka HITO ka kwah ba iaka jingtohkit halor ka jingjia ha Mukroh dei ban kynnoh iaka tnat Ministry of Home Affairs (MHA) halor ka jingslem ban pynbeit iaka jingiakynad pud hapdeng ka Meghalaya bad Assam namar ka MHA kam shym la bud rai jong ka Khasi States bala soi da u Lat ka jylla Assam haka 29 Iaiong 1949.
“Ka sorkar India ne ka sorkar Meghalaya bad Assam kim lah ban don bynta ha ka jingiadie iathied jaka ha Meghalaya namar la ithuh ia kine katkum ka khyrnit ba hynriew ka riti synshar ka ri India bad lada ka don ka jingshah knieh jaka jong ki Khasi-Jaintia naka liang ka seng kam banse ban pyntip shaka United Nations Permanent Forum on Indigenous Issues (UNPFII) bad sha ka United Nations Organization (UNO)” la ong ka dorkhas.
Ka seng ka dawa ruh naka sorkar Meghalaya ba kam dei ban ialeh Politks haba iadei abd ka jingiapynbeit pud bad ka Assam bad dei namar kane donkam ban thaw da ka ‘Inter-State Council’ kumba la aibor daka Article 263 jong ka riti synshar ka ri India.
U bah Donbok u la pynpaw ruh ba ka jingaiti iaka Block I bad Block II shaka Assam kan long ka jingpynkhien iaka Para 14 jong ka khyrnit ba hynriew ka riti synshar ka ri Idndai.
“Ha u snem 1951 u Lat ka jylla Assam u la aiti jubor iaka Block-1 bad Block-2 kiba dei ki jaka Khasi-Jaintia shaka Assam kaba dang dei ka United Mikir Hills District Council bad mynta ka Karbi-Anglong Autonomous Council bad kane ka long beain katkum ka Para 14 jong ka riti synshar ka ri Indai” la kynnoh ka HITO.’
Nalor kane ka HITO ka dawa ruh naka sorkar jylla ban pynkiew iaka jingsiew bailutksan sha ki lanot kiba shah siat iap ha ki pulit Assam haka 22 tarik Naiwieng.
