Shillong Nailar 09: Ka Hynniewtrep National Awakening Movement (HANM) hynne ka sngi Balang, kala dawa iaka Khasi Hills Autonomous District Council (KHADC) ba kadei ba kan bthah ia baroh ki Syiem ba kin hukum ia ki Dorbar Shnong ba kidei ban shna ia ki Aiñ ban ym shah shuh ia ki Kynthei Khasi ba kin ia shongkha bad ki Bar Jylla.
“Ngi la dawa na u CEM ka KHADC u Bah Pyniaid Sing Syiem ba ka KHADC kadei ban bthah ia ki Syiem ba kidei ban hukum ia ki ia ki Dorbar Shnong bad ia ki Rangbah Shnong ba kidei ban shna ia ki Aiñ kiba kyrpang ban ym shah shuh ia ki Kynthei Khasi ba kin ia shongkha bad ki Bar Jylla” ong u President ka HANM Bah Lamphrang Kharbani hadien ka jingiakyn duh ia u CEM ka KHADC.
“Ngim khang iaki Kynthei Khasi ba kin ia shongkha khleh hynrei kim dei ban pynjaboh iaka shnong ne ia ka jaidbynriew bad lada ngim leh eiei ia kane da ka Plan A ne B, kan buh haka jingma kaba shyrkhei ia ka jaidbynriew jong ngi” ula bynrap.
Une u Nongialam ka HANM ula ong ba lada kano kano ka kynthei Khasi ka ioh lok da u Bar Jylla kidei ban ioh iaka jingpynshitom naka shnong bad na ka Hima.
Ula ong, nalor ba ia ka khaii pateng la synshar da ki bar jylla, lada nang jur sa ka shongkha khlehm kan sa poi ka por ba ka jaidbynriew kan sa kylla long nongwei hala ka jong ka jylla bad kaba ma ka long, ba ynda la kylla kum ki ritpaid bad ki bar jylla kila long ki heh paid, kan long thik kumba leh ki Meitei ha Manipur ban dawa iaka hok ka jongki bad hangta kan sa mih ka thma kaba shyrkhei tam.
“Ka jingdawa ka jong ngi na u CEM ka long ba kum u khlieh jong ka Council yn bthah ia ki Syiem bad ki Syiem kin hukum ia ki Dorbar Shnong, Rangabh Shnong, Sordar Shnong ban shna da ki aiñ ban ym shah shuh ba ki kynthei Khasi kin iashongkha bad u bar jylla namar ngi hap ban sngewthuh lada iaka khaii pateng yn bat ma u bad iaka shongkha ruh, shaei ka lawei jong ka jaidbynriew” ong u Bah Kharbani.
Ula ong, ba ka seng ka kyrmen skhem ba u CEM ka KHADC yn shimkhia ia kane ka mat jingdawa na ka bynta ban iada iaka ri bad ia ka jaidbynriew.
