Nongstoiñ, Lber 27: Ka seng Federation of Khasi Jaiñtia & Garo People West Khasi Hills-West Khasi Hills, ka la dawa ia u Myntri ka Tnad ialehkai ka Jylla Bah Shakliar Warjri ban ai jingpynshai halor ka jingpynduh noh ka Sorkar-MDA ia ka madan phlang plastic (Artificial Turf) bala kular ban ai ha Nongstoin.
U Sports Secretary Bah Anthony Umiong, haba iakren bad ki nongthoh khubor hynne ka sngi Nyngkong, ula ong b aka FKJGP-WKH ka bynniaw jur ia ka jingkren kut lad jong u Myntri haba jubab ia ka jingkylli bala wanrah da u MLA ka Nongstoin ha ka Dorbar Mang tyngka ka Iingdorbar, kaba long ha ka sngi Balang jong ka taiew bala lah.
“Ka seng ka kwah ba un (Myntri) pynshai ïa ka daw balei ba ka West Khasi Hills kam lah ban ïoh ïa ki artificial turf ne ka madan phlang plastic. Kane ka madan ka dei ka jingkular jong u Myntri ialehkai barim Bah Banteidor Lyngdoh. Lada ka madan jong ka NDSA kaba don ha Nongpyndeng kam long satia ban siang da u phlang plastic, lah dei ban shna pynbha noh ïa ka madan Nongpathar ha Pyndengrei” ula ong.
Une u Nongialam ka FKHGP u la ong ruh ba ka seng kam kwah satia ba kat u Myntri sorkar un shu kren kutlad, namar ki khynnah na West Khasi Hills kim dei shuh kiba dang sahdien ha ka phutbol hynrei ki dei kiba la paw bha. Nalor kata u la ong ruh ba baroh ki paitbah nongshong shnong ka West Khasi Hills ki dei kiba ieit bha ïa ka phutbol.
U la ong ruh ba ha ka jingshisha ka madan ha Nongpathar ka dei kaba la shimti da ka Directorate of Sports &Youth Affairs. Lada ka sorkar ka kwah ban kyntiew ïa ki samla ha ka kam sport u Myntri um dei ban shu kren kutlad, da kaba ong ba ka West Khasi Hills ka dang jngai ban ïoh artificial turf.
U la ong ruh ba ha u snem ba la dep ka sorkar MDA ka la dep pynbna lyngba ki lad pathai khubor ba kan pynïoh ar tylli ki artificial turf ha man la kawei pa kawei ka District hapoh ka jylla. Ha ka jingshisha ka pisa kaba la mang na ka bynta ban shna ïa kine ki madan, ka la dei ban don lypa, hynrei lada kam pat don kumno ka sorkar kan shu pynbna bad thok ïa ki paitbah.
