Nongstoin, Naitung 19 : Ka FKJGP-Lai Lyngdoh Area Unit kala dawa ia ka Tnad PWD (Roads) ba kan tuklar lem halor ka jingsniew shaba palat pud jong ka surok naduh Kynroh Nongkynjang haduh Mawpun Rangblang kaba la pyntrei da ka kompani ba na Russia, kaba la buh jingeh shikatdei eh ia ki paid nongshongshnong ka thain.
Ka FKJGP-Lai Lyngdoh Unit kala aiti da ka dorkhas sha u Executive Engineer ka PWD (R) ka Nongstoin Division, West Khasi Hills ba dawa ban tuklar mardor halor ka jinglong jingman jong kane ka surok, kaba pyniasoh ia ka thain bad ka sor Nongstoin.
Kat kum ka dorkhas, ka seng kala pyntip ba kane ka surok bala pyntrei da ka kompani na Russia, kala pynsohsat bha ia ki paidbah ha ka leit ka wan namar ka jingsniew bad jingkylla ahor ktieh ha kane ka aiom slap. Ka ong ba kane baroh ka wan jia namar kane ka kompani kam shym la shna pynbha ia ka surok bad shu ieh lyngkrang ia ka.
Ka FKJGP-Lai Lyngdoh ka kyrpad ia une u Executive Engineer ba un phah siang mawria ne pyndap da ki kynja khyndew/maw ha shilynter kane ka surok khnang ba kan ym pynjyrsieh ia ka surok, kaba dei ka surok ba kongsan eh ba ju pyndonkam da ki paidbah ha ka leit iew leit hat, leit trei bad leit pyndep ia ki kam ki jam khamtam ki khynnah skul.
Kala ong ruh ba dei ban bthah ia kane ka kompani ba kan siang maw noh ia baroh ki subway kiba la shu shna tangdep, kiba la shna ban lied ia ka jingkieng barim da ka jingthmu ban tei thymmai pat ia ka.
Ka FKJGP kala ujor ruh halor ka jingtih nongrim ban pynieng ia ki paia jong ka jingkieng ba thymmai ia kaba la kynnoh ba la shu leh torti bad isynjor bha, kaba buh pynban ha ka jingma ia ka jingkieng. Kala ong ba katei ka jingkieng kam dei satia kaba la trei skhem ha kaba wat ban iaid ki kali rit ruh, kala padai bad khynniuh katno tam ban iaid ki kali heh khamtam ki kali kiba kit palat pud.
Ka FKJGP kala pyntip ba une u Engineer ula kular ba un sa tuklar bad khmih bniah ia kane ka kam bad ba un sa bthah ruh ia katei ka kompani ba kan trei janai ia ka kam.
Pule lang ia kane: Hiar ka TMC sha Manipur ban iakynduh ia ki Jaidbynriew ba shah ktah ha ka kam iaumsnam
