Shillong Risaw 28: Ka Federation of Khasi Jaintia and Garo People (FKJGP) hynne ka sngi kala dawa naka sorkar jylla ba ka dei ban shimkhia halor ka jingnang bun ka jingbym iohkam iohjam ki samla da kaba thungkam noh ia ki ha ki 7600 tylli ki kam sorkar kiba lait ha ki tnad sorkar bapher bapher bad ban thaw noh ruh ia ka State Employment Policy bad ia ka Youth Commission.
Haba kren haka jingialang paidbah ha Madan Iewrynghep, u President ka FKJGP u Bah Dundee C Khongsit ula ong, “Ngi dawa na ka sorkar ba ka dei ban thungkam noh mardor ha ki 7653 tylli ki kam sorkar kiba lait thylli kumba la lap da nongwad RTI u Bah Disparsing Rani”.
“Ngi dawa ruh ba ka sorkar kadei ban thaw noh iaka State Employment Policy khnang ba kan don ka jingpyniaid ryntih haka jingthungkam thungjam ha ki ophis jong ka sorkar pdeng kiba don haka jylla bad kumjuh ia ki karkhana bad kompani shimet bad ki Bank kiba pyniaid da ki riewshimet” ong u Bah Dundee.
Ula ong, shisien ba la don ka state employment policy, ka sorkar ka lah ban buh iaki kyndon treikam ban pynthikna ba nyngkong eh dei ban ailad shwa iaki trai jylla ki bym donkam donjam ha ki karkhana ne kompani shimet.
Ula ong, ka sorkar kadei ban thaw ruh iaka State Youth Commission ka ban shimkhia iaka jingeh kaba mad da ki samla khlem kam khlem jam haba ki leit ban thep kam.
“Ngi tip bha iaka jingeh kaba mad da ki samla ki bym donkam donjam kiba wadkam ha kylleng ki tnad sorkar. Ngi la ioh pdiang ruh ia ki jingujor ba ki samla kiba wad kam ki shah pyndik ha ki ophisar kiba bat ia ki kyrdan kiba heh. Kumta lada ka sorkar ka thaw iaka state youth commission, kan khmih bniah halor kine ki jingeh baroh kiba ki samla ki mad” ong une u Nongialam ka FKJGP.
U Bah Dundee ula ong, ka seng kan leit ruh ban iakynduh bad ban aiti da ka dorkhas sha ka sorkar jylla halor katei ka mat ha kine ki sngi ban wan bad kin pyrshang ban buh por iaka sorkar ba kadei ban pynurlong noh ia kitei ki mat jingdawa.
Une u nongialam ka FKJGP ula ong halor ka jingdawa ba dei ban pynduh pyndam noh ia ka jing pynlong iaka interbiw thungkam kadei kaei kaei kaba ka seng ka hap ban iashong pyrkhat shwa ba kan shim ia kano kano ka rai.
U President ka KSU samla Lambokstarwell Marngar ula ong haba iakren eiei shaphang ka Meghalaya Public Services Commission (MPSC) bad ki District Selection Committee (DSC), ka don beit ka jingkynnoh pyrshah ia kine ki bor treikam ba ki pyndonkam da ka lynti ka bym khuid ha ka ban thungkam thungjam.
“Sa katno snem ngin iakren shaphang kane ka jingleh be-aiñ ha kaba iadei bad ka rukom thungkam thungjam? La buh jingkylli u Samla Lambokstarwell bad ka ong “Nga ju iohsngew naki samla shaphang ka jingeh kaba ki shem bad ki ong, ba ki kmie ki kpa jong ki kila shim da ka ram ba kin ioh ban pule, hynrei hadien ba kila pyndep iaka jingpule, ki kmie ki kpa ki hap ban shim ram biang ban thied ia ka kam naka bynta ki khun jongki” ong u nongialam ka KSU.
U la ong, katei kala jia kadei namar jong kito kiba shong ha Secretariat kiba ak kum ki kynrad ha ka jaka ba kin long kum ki nongialam.
“Kumta lada ngi ailad ia kitei ki kynrad ba shong ha Secretariat, ka jylla da lei-lei kan ym iohi ia ki polisi treikam ki ban ai jingmyntoi ia u paidbah, kumta ngi donkam ia ki nongialam kiban wanrah iaka jingkylla na ka bynta ka lawei kaba phyrnai jong ki samla bad ka jylla “ ong u Samla Lambokstarwell Marngar.
U President ka Hynniewtrep National Youth Front (HNYF) u Bah Sadon K Blah ula ther iaka Meghalaya Youth Policy jong ka sorkar jylla kaba la kren bun halor ki prokram hynrei kala sngap jar pat halor ki lad ki lynti ban aikam aijam iaki samla.
Ula ong, ka sorkar kala pulom ha kaban pynthikna ban bhah kam bhah jam 60% naka bynta ki trai jylla ha ki karkhana.
“Ngi don palat 10 tylli ki karkhana pynmih dewbilat hynrei haba ngi la pynlong iaka jingjurip ha kitei ki karkhana, ngi la shem ba kiba bun ki nongtrei kiba bat iaki kyrdan kiba heh kidei kiba nabar ka jylla katba ki trai jylla ki trei iaka kam da kaba rah ia ki borti, ban pynkhuid ia ki kamra bad ban ai sha ia ki” ong u Bah Sadon Blah bad ka bynrap “Ka 60% ka jingbhah kam na ka bynta ki trai jylla ym shim la pyntreikam satia namar iakiba bun hi ki kam ha kitei ki karkhana la ai sha ki briew kiba nabar ka jylla”.
“Ki briew kiba ioh jingmyntoi na kitei ki kompani ban bat iaki kam kiba heh, kidei tang kito kiba ieng ban long kum ka stieh bad kiba kloi ban iada ia ka karkhana la ka long ha kano kano ka dur ruh khamtam lada jia ba ki sengbhalang ki pynmih ia kano kano ka ishu.Ngi hap ban kdewkti ialade ruh ym tang iaka sorkar ha kaba iadei bad kane ka mat jong ka jingbym iohkam iohjam ki samla ka jylla” ong u Bah Blah.
Nalor kane ula kynnoh ruh iaka sorkar jylla ba kala leh politik halor ka ishu jong ka jingbym donkam donjam ki samla da kaba pynlong ia ki tamsa ki bapher bapher.
“Ka jingpynlong iaki tamsa kadei ka lynti ban pynbiej ia ki samla khnang ba kin klet noh iaka jingshisha ba kidei ki bym don iaka kam ka jam” ong u President ka HNYF.
Ula kyntu ia ki paidbah ka jylla ba kidei ban long kiba shemphang haba ki jied ia ki nongmihkhmat ha ka elekshon MLA ban wan.
“Ki myntri sorkar bad ki MLA kin wan ban khroh ban jied biang ia ki kum ki nongmihkhmat hynrei nga kyntu ia phi ba phi dei ban jied ia ka lawei kaba phyrnai ban iaka tyngka” ong u Bah Blah.
Ula ong, sa tang kato katne bnai, ki myntri sorkar kin sa pynbna iaka jingdon jingem ka jong ki bad yn sa iohi ba ka jingdon jingem ka jong ki kala kiew naka T.5 Klur sha ka T.20 Klur bad kane ka jingkiew spah kynsan kadei kaba mih naka jingbamsap bad ka jinglute ia u paidbah.
