Shillong, Risaw 20 : Ka Federation of Khasi Jaintia & Garo People (FKJGP) kala dawa na ka Sorkar Jylla ba ka dei ban pynrung noh ia ka soskular Instrument of Accession (IOA), ka Annexed Agreement (AA), Instrument of Merger bad ka Standstill Ageement (SA) ha ki jingpule ha ki skul bad College khnang ba ka Jaidbynriew kan tip iala ka tynrai bad kumno ka kylla long ki Nong India.
“Ka FKJGP ka kwah ba ka IOA, ka AA bad ka SA ki dei ban rung noh ha ki lynnong jong ki kot history ba pynpule ha ki skul bad College. Kane kan iarap ia ki pateng jong ka Jaidbynriew ba kin tip iala ka tynrai bad ka jingkylla long nong India” ong u Bah Eldie Newton Lyngdoh, General Secretary ka FKJGP.
Kat kum ka jingong jong u, ka Jylla Meghalaya kala rakhe mynta u snem ia ka jingdap 50 snem bad lashai ka 21 tarik Risaw, ka Jaidbynriew Hynniewtrep kan rakhe ia ka lyngkhuh sngi iap ba 34 snem jong u Syiem Khynnah ka Hima Nongstoin, Wickliff Syiem, ka seng ka sngew ba ka por kala dei ba kum ka Jaidbynriew baroh kawei, ki dei ban tip bha noh shaphang ki Khlawait ka Jaidbynriew bad ki soskular ba ka Jaidbynriew kala iasoi bad ka Sorkar India.
Lah ban kdew hangne ba ia ka Instrument of Accession bad ka Annexed Agreement, la soi bad pdiang da u Governor General of India Shri. C Rajagopalachari bad ka Federation of Khasi States ha ka 17th August 1948.
Hynrei u Syiem Khynnah ka Hima Nongstoiñ, u Wickliffe Syiem, ula pyrshah ia kine ki soskular namar ka jingbym kwah ba ka Hima Nongstoin kan snoh bad ka Ri India. Kumta u la leit sah noh sha shnong Rajai kaba don ha Sunamganj distrik Bangladesh.
La kha ia u Syiem Wickliff ha ka iing ki Syiem Nongstoin ha Nongstoin ha ka 14 tarik u August 1909 bad ula khlad noh ha 21 tarik u October 1988. U la long u khun uba saw hapdeng shipara.
U Bah Eldie ula pynpaw ruh ia ka jingdonkam ba ka Sorkar Jylla ka dei ban pynrung lang noh ia ki khana pateng jong ki riewshlur ne khlawait ka Jylla-U Tirot Sing Syiem, Kiang Nongbah bad kiwei kiwei ha ki jingpule jong ki skul bad ki College.
“Ka Jaidbynriew ka donkam ban tip bha shaphang ki khana jong kine ki khla wait bad ka mynsiem len lade kaba ki don. Kane kan pyrsud ia ka mynsiem ieid ri jong ki pateng ban dang wan ka Jaidbynriew” ula ong.
Une u Nongialam ka FKJGP u pyntip ba shen ka FKJGP kan sa lum ia ka jingialang jong ka Education Cell na ka bynta ban buddien ia kane ka jingdawa bad ka Sorkar Jylla.
