Nongstoiñ, Ïaïong 30: Ka FKJGP-Mawlangsu Area Unit, kala dawa ia ka Tnad ka Koit ka Khiah ba kan phaikhmat lang sha ka Mawlangu Sub Health Centre da kaba pynbiang ia ki jingdonkam ha kane ka jaka sumar.
Kane ka jingdawa kala mih hadien ka jingleit jurip jong ki nongialam ka FKJGP-Mawlangsu hapoh ka jingialam u President Bah Syrpaily Kharit, ia kane ka jaka sumar ha ka sngi saitjain bala lah.
Kane ka seng kala lap ba kane ka jaka sumar ka don hapdeng shibun ki jingduna naduh ka jingduna ki nongtrei, ka jingbym biang ki tiar ki tar bad ki dawai dashin ban shakri ia ki paidbah ka thain.
U bah Syrpaily Kharit ula ong ba kane ka jaka sumar ka dei kaba donkam bha ha ka thain haba pyntip ba ki paidbah naduh ka shnong Nongriat, Mawlun, Nginiong, Mawbudum, Lumyrsiang, Tiedang, Mawlangsu, Domkohmen bad kiwei kiwei, ki dei kiba ap ia ka jingshakri jong kane ka jaka sumar haba pang ba shitom.
Ula ong ba ka jingduna ha kane ka jaka sumar kala buh ha ka jingeh ia ki paidbah haba pang ba shitom khamtam ia ki Longkmie ba armet ba kin peit phah sumar (checkup) namar ki hap ban leit shaduh sha Nongstoin ne sha Mawkasa PHC kaba la jngai n aka thain.
