Kyntu ia u MLA thymmai R.G Momin ban shimkhia
Nongstoiñ, Lber 12: Ka Federation of Khasi Jaiñtia & Garo People Kyrshai Area Unit, ka la dawa ia ka Sorkar Jylla ba kan kyntiew kyrdan noh ia ka Kyrshai Sub Health Centre haba kyntu ruh ia u MLA ba thymmai ka Rambrai-Jyrngam RG Momin ba un shimkhia ha kaban tynruh ia ka Sorkar Jylla.
“Ka por kala dei ba ka Tnad ka Koit ka Khiah kan kyntiew kyrdan noh ia ka Kyrshai Sub Heath Centre” ong u President ka FKJGP-Kyrshai Unit Francis Sohshang.
Lah ban kdew hangne ba ka Seng kala dei iakynduh ruh ia u District Medical & Health Officer (DMHO) ka West Khasi Hills, ban buh hakhmat ia kane ka jingdawa na ka bynta ka bit ka biang jong ki nongshongshnong ka thain.
U Samla Francis Sohshang ula iathuh ba ka shnong Kyrshai kaba hap hapoh ka Nongstoiñ C&RD Block, ka dei kaba jngai kumba 70 kilomitar na Nongstoiñ lada ïaid lyngba ka Rambrai bad ka don ha khappud bad ka Assam.
U iathuh ba ki don kumba 15 tylli ki shnong kiba hap ha katei ka thain ba kynthup ïa ka Mawpun, Nongspung, Ukiam, Borkhuli, Doledonga, Warigro, Umdiengsiar, Hasem, Umthli Umdiengphiang, Talimara, Mawdiangkop, Dariphang, Umbah, Umkhamdor bad Patharphlang, kiba ka jingnang roi ki nongshong shnong ka la kiew man ka por.
“Kumta la donkam kyrkieh ban pynbiang ki lad jingsumar kiba kham bha katkum ka jingdonkam jong ki paidbah kiba la nang roi na ka por sha ka por” ula ong.
Une u Nongialam Sengbhalang ula ong ba ka Thain ka dei ruh ka jaka kaba jur bha ka jingpang khieshohrih ha kaba bun ki nongshongshnong naduh ki Khunlung ba dang hap 5 snem, kila ioh ia kane ka jingpang. U ong ba ka jingbym don ia ka jaka sumar kaba biang, kiba bun ki nongpang khieshohrih kila hap ban shaniah ha ki kobiraj ne ki doktor jakoid.
U samla Francis u iathuh ba tang ki Longiing kiba kham ioh kham kot, ki lah ban leit wad jingsumar shaduh ka Boko CHC kaba don ha Kamrup District, kaba jngai kumba 50 Km n aka thain bad don ruh kiba leit shaduh sha Guwahati.
Une u Nongialam ka FKJGP ula kyntu ïa u MLA R.G Momin, ba un shimkhia lem ha kaban pynsngew sha ka sorkar halor katei ka jingdawa jong u paidbah, khnang ba kiba pang ba shitom kin ïoh ïa ka jingïarap kaba biang.
