Shillong, Rymphang 12: Ka Federation of Khasi Jaintia and Garo People’s hynne ka sngi nyngkong kala dawa na ka Myntri ka koit ka khiah Kong Ampareen Lyngdoh, ba kan kyntiew kyrdan noh ia ka Nartiang PHC sha ka Sub District Hospital ba kan lah ai ka jingshakri kaba kham bha shuh shuh ia ki paidbah ka thain.
Ka FKJGP hapoh ka jingialam u Vice President Bah Kitboklang Nongphlang uba khmih ruh iaka FKJGP Jaintia Hills ryngkat bad u President ka FKJGP Nartiang Unit Bah Bin Raliang, kila aiti da ka dorkhas ha ka Kong Ampareen ba dawa ban kyntiew kyrdan noh ia katei ka jaka ai jingsumar kaba la don naduh u snem 1950.
“Ka Nartiang PHC kadei kaba la don naduh u snem 1950 ha ka por ba ka jylla ka dang hap hapoh ka jylla Assam bad ha u snem 1950 la tip ia ka kum ka State Dispensary hynrei ha u snem 2001 la ithuh noh iaka kum ka PHC kaba don 10 jingthiah” ong u Bah Kitboklang.
“Kane ka PHC ka ai jingshakri ia 36 tylli ki shnong bad ia palat 37295 ngut ki paid nongshong shnong bad mynta kala long kaba donkam ban kyntiew kyrdan noh ia kane ka jaka sumar khnang ba kan lah ban ai ka jingsumar kaba paka ia ki paidbah” ula bynrap.
Katba u Bah Bin Raliang ula iathuh “Ka Myntri kala ai ia ka jingkular ban shimkhia ia kane ka jingdawa ka seng bad pyntip ba kan sa pynbeit ia ka jingleit jurip ia ka PHC kaban donlang ka District Medical Health Officer bad ka seng FKJGP khnang ba kan ioh leh ia kaba donkam” ong u Bah Bin.
