Shillong Nohprah 07: Ka Federation of Khasi Jaintia and Garo Peoples (FKJGP) hynne ka sngi Balang, kala dawa naka sorkar jylla ba ka dei ban buh iaka Feedmill ne karkhana ban shna iaki jingbam jong ki jingri ha jaka kaba don bun ki nongri jingri khnang ba kan pynsuk iaki.
“Ngi la ai jingmut iaka sorkar ba kadei ban buh iaka Feedmill haka jaka kaba biang tam, kaba don ia ki nongri jingri” ong u President ka FKJGP Bah Dundee C Khongsit haba iakren bad ki lad pathai khubor hadien ka jingiakynduh ia u Symbud Myntri Rangbah ka Jylla Bah Prestone Tynsong.
Kat kum ka jingong jong u, “Haba don ki Feedmill yn donkam ia u riewhadem bad kiwei kiwei ki mar rep bad kumta dei ban don iaka polisi treikam bad ka tnad ka Rep ka riang ka dei ban pynsngewthuh ia ki nongrep iaki jingthung bapher kiba donkam ban pyndonkam ha ka Feedmill, khnang ba kan long ka jingmyntoi iaki nongrep bad ia ki nongri jingri haka jylla”.
“80 naka 100 ki paidbah ki jong ngi ki hap ban thied ia ki doh na kiwei pat ki jylla bad ka jingioh iaka Feedmill kan long ka jingkyrkhu ia ka jylla bad kan kyntiew iaka roi ka par bad ia ka ioh ka kot” ong u Bah Khongsit haba pyntip “U Symbud Myntri Rangbah ka jylla ula kular ban leh ia kaba bha tam halor ka jingai jingmut jong ka seng”
U President ka FKJGP ula ong, kiba bun hi nongri jingri haka jylla kidei na Ri Bhoi, East Jaintia Hills bad West Khasi Hills hynrei u Bah Prestone ula pyni baka sorkar ka shem jingeh ban ioh ia ki jaka bad ki hap ban peit ha baroh ki liang bad ka sorkar kala dep ban jurip ia ki katto katne ki jaka ban buh iaka Feedmill.
“Ka sorkar kala thmu ban buh ia katei ka karkhana ha Baridua ha ka jaka jong ka tnad Mining hynrei ka don tang 7 akar bad ban tei iaka Feedmill donkam iaka jaka kaba 25 akar, kumta ka sorkar kala pynpaw iaka jingdon iaka jaka ha Mendipathar, rilum Garo ban tei iaka Feedmill bad kane ka jaka ka long pdeng bha ban ai jingshakri ia kiwei pat ki jylla ka thain shatei lam mihngi bad ki nongrep ka jylla ki lah ban shalan ia ki marrep jongki ha katei ka karkhana” la iathuh u Bah Khongsit.
Ula ong, ka seng kan peit iaka nongrim jong ka sorkar halor ka jingbuh iaka Feedmill bad lada ka don ka jingioh nong, ka seng kan ym don eiei ban pyrshah bad ula iathuh baka sorkar jylla kala dep ban ioh iaka bhah tyngka haka wat kaba nyngkong naka bynta ban tei iaka Feedmill hapoh u bnai Lber jong u snem ban wan.
