Shillong, Risaw 07: U MLA ka Pynthorumkhrah konstitwensi u bah A.L Hek u ba dei naka seng Bhartiya Janata Party (BJP) ula ong ba u myntri ka tnat kam pohing u bah Lahkmen Rymbui udei ban hiar shuki noh namar ka tnat pulit kam khein briew iaki nonghikai kontrak khamtam iaki riew kynthei ba armet.
U bah Hek ula ong baka jingleh ki pulit pyrshah iaki nonghikai ba iakhih daka ba jai jai ka paw thik ba ki pulit haka jingkhmih u bah Lahkmen kum u myntri kam khein snep iaka hok long briew man briew.
“Wat ha ki lad pathai khubor, kila paw ba ka UDP ruh ka kwah ba u bah Lahkmen udei ban hiar shuki noh bad dei namar kane, u bah Lahkmen udei ban hiar shuki don burom noh naka kam kum u myntri ka pule puthi” la ong u bah Hek.
U bah Hek ula ong baka sorkar khamtam ka tnat pulit kadei ban pynshai haba iadei bad ka jingkawang bom pynsat khmat ki pulit iaki nonghikai wat hapdeng ka jingdon lang ki longkmie ba armet bad ki khynnah.
Ula ong ba ki nonghikai kontrak kiba iakhih haka 6 tarik ki long kiba shida bad ki iakhih ban dawa beit tang iaka hok hynrei ka jingkawang bom pynsat khmat da ki pulit ka pyni ba kim kheiñ bad kim burom satia iaka hok long briew man briew ki nonghikai.
