Shillong, Risaw 03 : Ka Meghalaya BJP ha ka sngi Palei, kala kyntu ia u Myntri Rangbah ka Jylla Conrad K Sangma ba un tuklar lem halor ki jingkynnoh leh bakla bad bym hok ha ka jingpynmih ia ka result ba dang shen jong ka eksam thungkam Staff Nurse bad ANM.
“(Ngi) kyntu ia u Myntri Rangbah ka Meghalaya ban tuklar ban pynthikna ba ka rukom thungkam hapoh ka Jylla ka dei ia kaban pynlong khlem ka jingshah liang bad baka rukom pynlong ia ki eksam kim dei ban lehthok bad ka result kam dei ia kaban pynkylla tang ban pynmyntoi ia ki katto katne” ong ka kyrwoh na u General Secretary ka BJP Wankitbok Pohshna ha ka kyrwoh.
“Dang shen, ka Ri kala peit ia ki jingshyrkhei ka jyrsieh thungkam ha West Bengal kaba la pynjot ia ka jingim jong ki million ngut ki briew. Kam dei ia ngi ban khang ia ka Meghalaya ba kan iaid ha kane ka juh ka lynti ba pynjot” ula bynrap.
U Bah Pohshna ula kdew ruh ia shibun ki jingleh bakla ha ka jingpynbna ia ka result thungkam staff nurse da ka Meghalaya Medical Services Recruitment Board.
“Da ki hajar ki samla kiba ieng lain ban ioh ia ka kam Sorkar ki khmih lynti ia ka jinglong shai bad jing leh hok da ki bor nongthungkam bad ki nongpyniaid ia ki eksam kum ka MPSC bad ka MMSRB, ki dei ban pynshisah ba baroh ki eksam ki dei kiba lait na ki jingleh bymhok” ula ong.
Kat kum ka jingong jong u, ka lawei jong ka Jylla ka dei kaba la iapein lada ki briew kiba don hok ki shah pynduh tang namar kine ki jingleh bakla kiba paw pyrthei manla ka por.
