Shillong, Risaw 13: Ka Bharatiya Janata Party (BJP)-Meghalaya, kala dawa ban weng noh mardor ia ka Deputy Commissioner ka East Khasi Hills, da kaba kdew ia ka jingbym lah jong ka bor synshar district ban teh lakam ia ka jingkiew jong ki kam runar pyrshah ia ki khynnah dang shen.
Ha ka kyrwoh ba pyllait ha ka sngi Nyngkong, u General Secretary ka BJP Wankitbok Pohshna ula pynpaw ia ka jingsngewkhia kaba jur halor ka jingnang kiew ki jingjia pyntriem, haba pynpaw ba ki bor District kim shym la lah ban treibha iala ka kamram.
“Ka bor district kam dei ban donkam ia ngi ba ngin pynkynmaw ia ki ia ka kamram jong ki ne ban batai ia ki kumno ban pyndep ia ka kamram jong ki. Ki ophisar kiba don ka jingkitkhlieh ki donkam ban pyndonkam ia la ka jong ka bor khlem da khein ia kano kano ka jingpynbor. Lada kam jia kumta, ka sorkar ka dei ban weng noh mardor ia kum kine ki ophisar ki bym lah ban pyniaid ia ka bor synshar distrik bad bujli ia ki da kiba briew ba lah bad ba don ka jingkitkhlie” ula ong.
U Pohshna u la kynnoh ba kam don satia ka jingshim ia ki lad ki lynti kiba biang da ka bor synshar district ban iada ia kum kine ki kam runar, kynthup ia ka jingduna ban don ki pulit, ka jingbym don ka pahara ba man ka por, bad ka jingbym don ka jingpahara miet kaba la pynbeit ryntih.
U la ban jur ia ka jingdonkam ban pynkhlain ia ki lad jingiada, kum ka jingpeitngor baroh shisngi ia ki jaka rung bad jaka mih, ka jingbuh ia ki Village Defense Parties (VDP) bad ki pulit, bad ka jingpyn iadon bynta lang ia ki nongtrei mon sngewbha na ka thain ban pynthikna ia ka jingshngain jong ki khynnah.
Utei u nongïalam ka BJP u la kynthoh jur ïa ka bor synshar ba ka leh smat leh sting tang ha ki prokram ba kyrpang, kum ka tamasa Cherry Blossom ne ki jingïalehkai phutbol, katba ka iehnoh ïa ki mat kiba kongsan kum ka jingdih kyiad ha ka por miet bad ka jingdih drok ha ki bynta bapher bapher jong ka nongbah Shillong.
U Bah Pohshna u la kyntu ïa ka sorkar ba ka dei ban pan jingïarap na ka Home Ministry ka Sorkar Pdeng bad ki riew shemphang ban lap bad weng ïa ki daw tynrai jong kine ki kam sniew.
-Meghalaya, kala dawa ban weng noh mardor ia ka Deputy Commissioner ka East Khasi Hills, da kaba kdew ia ka jingbym lah jong ka bor synshar district ban teh lakam ia ka jingkiew jong ki kam runar pyrshah ia ki khynnah dang shen.){kind=link}