SHILLONG, Risaw 07: U Chief Whip ka Liang pyrshahbah George B Lyngdoh ula dawa baka sorkar kadei ban pynshai iaka jingthmu kumno ka sorkar kan leh iaki 800 ngut ki nonghikai kontrak ki ba dang iakhih.
U bah George u ba dei ruh u MLA ka Umroi naka seng All India Trinamool Congress (AITC) u la leit ban kynduh iaki nonghikai kontrak kiba sah miet ha khyrdop ka Secretariat naduh ba ki shah kawang bomb pynsat khmat hynnin ka sngi haki pulit katba ki dang iaid na Lad Civil Hospital sha khyrdop Secretariat.
Haba kren sha ki lad pathai khubor, u bah Lyngdoh u la ong ba u Myntri ka tnat pule puthi bah Lahkmen Rymbui bad u Myntri Rangbah ka jylla Conrad K Sangma kidei ban mih bad ban kren shai shaki nonghikai kiba shah bom lathi bad shah kawang bomb ha ki pulit haka 6 tarik Risaw 2022.
U bah George ula ong ba ka sorkar jylla kadei ban kren shai ia kaei ka ba kan leh iaki nonghikai kiba la shah wengkam watla kila shakri iaka kam hikai palat 10 snem.
“Ka sorkar kadei ban pynbna paidbah kaei ka thmu ban leh naka bynta ki nonghikai contract namar ka jingjia haka 6 tarik mynta u bnai kadei hi namar ba ki nonghikai kim pat shai halor ka jingthmu ka sorkar ” la ong u bah George.
U bah George ula ong ba lada ka sorkar ka dang thmu ban iai bteng ia kane ka jingñion beiñ iaki nonghikai ka por kan sa wan baka ka sorkar kan duh ka jingshaniah haba iadei bad ka synshar iaka jylla baroh kawei.
