Shillong, Iaiong 13 : Ka A•chik Conscious Holistic Integrated Krima (ACHIK) hynne ka sngi Palei, kala dawa ba u snem ot kyrteng (cut-off-year) ban pyntreikam ia ka Roster System ha Jylla ka dei ban sdang naduh u snem 1972.
Ha ka dorkhas bala phah sha u Symbud Myntri Rangbah ka Jylla Bah Prestone Tynsong, ka ACHIK kala ong “Ngi kwah ban iai ban ba ka seng na ka bynta ki paid A.chik, kala ieng ha ka nongrim ba kam dei ban don ka jingiapein bad u snem ot kyrteng bad ka seng ka dawa ba u snem 1972 u sei ban long u snem ot kyrteng jong ka Roster System ka Job Reservation Policy, kaba dei ka rukom treikam ka ban pynbiang tarajur ia ka jingleh bym hok ia ki paid A.chik”.
Kane ka Seng kala maham ruh ba “Lada mih ka jingleh bym hok ia ki paid A.chik, ka seng kan shim ia ka lynti jong ka jingiakhih kynthup ki rally ki ban pynlong kat kum ki kyndon jong ka Riti Synshar ka Ri” haba pyntip ruh baka seng kala sdang ban ialap paidbah ha kylleng ki jaka ka Ri-lum Garo halor kane ka kam.
Ka ACHIK kala byrngem ruh ban leit mudui sha ka Iingkashari Supreme Court lada mih ka jingleh bym hok ia ki paid A.chik ha ka jingshim rai da ka Kynhun Myntri lane ka All Party Meeting halor ka Roster System.
Ha kajuh ka por, ka Achik kala kyntu ia u Symbud Myntri Rangbah ban tuklar lem halor ka jingwanrah ia ka Winter Capital lane ka Nongbah ba-ar (second capital) ha Tura.
