Shillong, Jymmang 04 : U Rangbah Shnong ka Mawlyndep, Ri-Bhoi Bah Jinu Kharbuki ula dawa ia ka Sorkar Jylla ba kan siew bai lutksan ia ka longiing ka kong Paltima Rani kaba la shitom jur na ka jingkynnoh sumar tori ka Ganesh Das Hospital, Shillong ha ka por ba kha ia I Khunlung.
I Khunlung ila khlad ha Nazareth Hospital ha ka sngi Ba-ar hadien bala pynkynriah noh ia i na kane ka hospital Sorkar namar ba kam don satia ia ka kor iarap ring mynsiem (ventilator).
U Rangbah Shnong ka Mawlyndep ula dawa ia ka Sorkar ban ai ka jingpynsajia ia ki briew kiba donkti ha kaban ieh ia u thirnia shapoh ka met jong I Kong Paltima, ia kaba hap ban leit weng sha NEIGRIHMS hospital.
Ka Shnong kala khot ruh ia ka jingialang Excutive Committee ban iakren halor ka jingmut ban leit iakynduh ia ka Myntri ka Koit ka Khiah Kong Ampareen Lyngdoh.
Lah ban kdew ba ia ine I Khunlung la kha ha Ganesh Das Hospital hynrei hadien la hap pynkynriah noh sha Nazareth Hospital ha kaba ila khlad noh ha ka janmiet sngi Ba-ar.
Hynrei ia I Kmie la hap ban rah sha NEIGRIHM ban sei ia u thirnia bala ieh da ki Doktor ka Ganesh Das Hospital shapoh ka met.
Ha kajuh ka por, ki bahaiing I Kong Paltima Rani, Bah Donald Rani ula pynpaw ia ka jingsngewnguh ia ka NEIGRIHMS Hospital kaba la kloi ban pdiang bad ai jingsumar ia I Kong Paltima ha kaban sei ia u thirnia ha kamet. Ula pynrem jur ruh ia ka jingleh torti ka Ganesh Das Hospital.
