Shillong, Lber 05 : U Myntri Rangbah ka Jylla Conrad K Sangma ula sam ia ki cheque ba shongdor haduh T.28.49 klur sha ki nongioh jingmyntoi ha ki lai tylli ki C&RD Block ka East Garo Hills-Samanda, Songsak bad Dambo-Tongjeng-kaba dei na ka Green Meghalaya bad FOCUS +.
Ia kane ka jingsam cheque lah pynlong ha ka jingialang rakh ia ka jingdap phra snem jong ka Sorkar Meghalaya Democratic Alliance (MDA).
U Myntri Rangbah ula ainam sha ka jingkyrshan ki paidbah bad ka jingkyrshan ka Sorkar PDeng namar ka jingpyniaid sted ia ki jingtei bad ka jingkiew ka ioh ka kot, haba pynpaw ba ka Meghalaya mynta ka wan ba-ar ha ka jingkiew ka ioh ka kot hadien ka Tamil Nadu.
“Ngi la pynlut palat ia ka T.150 klur hapoh ka FOCUS ha kine ki san snem bala leit” ula ong ha ka jingialang ba long ha Police Parade Ground.
“Ngin iai bteng ban kyrshan ia ki paidbah jong ka Jylla da kaba pynjlan ia ka por pynrung kyrteng ba kin ioh ia ki jingmyntoi na ka FOCUS+ sa arsnem” ong u Conrad.
U Myntri Rangbah ula ong ba da ka jingkyrshan ki paidbah ka Jylla, ka Sorkar Meghalaya kala ioh ia ka lad ban wanrah ia bun ki skhim pynroi bad ki project bad ka Jylla kala sakhi ia ka jingkylla kaba khraw haba phai sha ka jingmih ki jingtei kiba kongsan.
Haba pynpaw ia ka jingsngewnguh ia ka Sorkar Pdeng bad ia u Myntri Rangbah Duh, Narendra Modi ba kila ai ia ka jingiarap ba donkam bad ka jingkyrshan ia ka Jylla, ula pyntip ba ka Meghalaya ka wan ba-ar haba phai sha ka jingkiew ka ioh ka kot hadien jong ka Tamil Nadu.
Ka Sorkar Meghakaya, kat kum ka jingong u Myntri Rangbah, ka dang wad ia baroh ki lad ki lynti ban wanrah ia ki kam pynroi ha baroh ki bynta bad ka roi ka par kaba neh ha ka Jylla haba pan ia ka jingiashimbynta jong ki shnong ki paidbah ban kynjoh ia ka thong bala buh.
U Myntri ka Tnad Soil & Water Conservation, PHE, Housing Marcuise N Marak, haba ai jingkren, ula ong ba hapoh ka “One Magnificient Meghalaya, Vission, 2032”, ka Meghalaya kala iohi ia ka jingkiew kaba khraw bha haba phai sha ki jingtei bad ka ioh ka kot hapoh ka jingialam jong u Myntri Rangbah Conrad K Sangma, uba don ia ka jingiohi jngai ban pynlong ia ka Meghalaya kawei na kiba being eh ki Jylla ha India da kaba buh ia ka thong ban kynjoh ia ka 16 billion economy hapoh u 2032.
U pyntip ba shen ka Sorkar kan sa pynkha ruh ia ka Horti-Agri College ha East Garo Hills ha ka dong Dawagre, Williamnagar bad ka Sorkar kala dei buh ia ka mang tyngka halor kane ha ka Dorbar Mang tyngka ba dang shu dep.
